Avokati i “Sony”: “The Interview” do të shfaqet

Boies u shfaq në një program të transmetuesit NBC, dhe deklaroi se komedia që shkaktoi kaq polemika e probleme do të shfaqet. Megjithatë, se si do të shfaqet ende nuk është e qartë.

“Sony vetëm sa e ka shtyrë. Kompania ka luftuar për ta shfaqur këtë film dhe ai do të shfaqet. Se si do të shfaqet, për momentin nuk dihet. Por është e sigurtë se po”, deklaroi Boies.

Avokati foli edhe për komentet e presidentit Obama, i cili kritkoi kompaninë për tërheqjen e filmit nga kinematë pas sulmit elektronik të hakerave koreano-veriorë.

“Mendoj se ajo çka duhet të bëjmë është ta shohim deklaratën e presidentit si një apel, në mënyrë që të gjithë amerikanët të bashkohen kundër asaj që përbën një kërcënim për sigurinë tonë kombëtare”, deklaroi Boies.

“Nëse akte të tilla kriminale të sponsorizuara nga shteti (hakerat e mbështetur nga qeveria koreane) mund të godasin Sony-n, atëherë ata mund të godasin çdo amerikan”, shtoi ai.

Të mërkurën e kaluar, që ishte dhe dita kur studioja kinematografike anuloi shfaqjen në kinema për Krishtlindje, “Sony Pictures” deklaroi se nuk kishte më në plan për ta transmetuar komedinë në ekranin e madh.

Ndërsa të premten, drejtori ekzekutiv i kompanisë, Michael Lynton tha se po shqyrtoheshin një seri alternativash për ta shfaqur filmin në një platformë tjetër.

Top Channel