Incidenti ajror i presidentit Trajkovski, raporti hetimor: Gabuan pilotët

Hetuesi boshnjak Omer Kuliç, që kryesoi hetimin, ka evidentuar edhe gabime të tjera para dhe gjatë fluturimit. Ai ka deklaruar se leja e fluturimit ishte dhënë pa dokumentacionin e nevojshëm dhe se avioni nuk ishte mirëmbajtur si duhet.

“Arsyet kryesore për rrëzimin e avionit janë shtatë gabimet e pilotëve gjatë fluturimit. E para, ata nuk duhet te fluturonin nga Shkupi drejt Mostarit atë mëngjes sepse nuk kishin pasur informacion për motin në Mostar, i cili ka qenë tepër i keq. Ju kujtoj se presidenti i Serbisë dhe ai i Kroacisë nuk kanë marrë pjesë në atë samit për shkak të motit të keq në atë qytet”, ka deklaruar Kuliç.

Në raportin që u prezantua të shtunën në Shkup nga hetuesi boshnjak, thuhet se autoritetet boshnjake nuk kanë mundur ta ndjekin avionin e presidentit të ndjerë nga toka pasi në aeroportin ku ai duhet të ulej mungonte radari.

Po ashtu, në raport evidentohet se, kutia e zezë dhe mjeti për lokalizimin e avionit të rrëzuar kanë qenë jofunksionale.

Ish-presidenti maqedonas Boris Trajkovski humbi jetën bashkë me tetë shoqëruesit e tij në muajin shkurt të vitit 2004, teksa po udhëtonin për në Konferencën Ndërkombëtare për Investime që mbahej në B e H.

Top Channel