Drejt evakuimit total

Në bordin e tragetit që digjej ndodheshin 478 udhëtarë, mes tyre edhe 33
shqiptarë.

Anija”San Giorgio” e marinës ushtarake italiane në të cilën
ndodhen pasagjerët e evakuuar mbërriti në portin e Brindizit rreth orës 5
të mëngjesit. Ndërsa parashikohet që brenda paradites të përfundojë
evakuimi i të gjithë pasagjerëve nëse gjithçka do të shkojë mirë.

Sipas burimeve, në bord udhëtonin 478 persona, pjesa më e madhe e të cilëve janë grekë dhe turq e ndërsa u mendua fillimisht se ishin 22 shtetas shqiptarë, por më pas u mësua se bëhej fjalë për 33 shqiptarë, nga të cilët 11 janë me dyshtetësi.

Alarmi SOS u dha rreth orës 6:50 të mëngjesit të ditës së diel, teksa forca e dallgëve të detit ishte 8 ballë. Mediat greke morën telefonatat e para nga pasagjerët të cilët dhanë dëshmi dramatike nga ajo që po përjetonin. Njëri nga udhëtarët tha se po mbyteshin, se anija ishte mbuluar nga uji dhe ndodhej e gjitha në errësirë. Duke menduar se mund të shpëtonin, disa prej udhëtarëve janë hedhur në det me shpresën se do t’i shpëtonin makthit të flakëve që kanë përfshirë 2/3 e anijes.

Pasagjeri e mbylli telefonatën me thirrjen për ndihmë pasi situata është e pakoordinuar dhe shanset e vetme për bordin është djegia ose mbytja në det.

Rreth 100 vetë u shpëtuan prej andej gjatë natës në kushte tepër të vështira, thonë rojet bregdetare italiane. Ekipet e shpëtimit që me shumë zor i kanë larguar pasagjerët me helikopterë në mes të errësirës dhe shkulmeve të erës, ishin të pajisura me aparate për të parë natën.

Piloti i forcave ajrore italiane, Antonio Laneve, tha për televizionin shtetëror se kabina e helikopterit të tij ishte mbushur me një tym djegës, çka e bënte edhe më sfidues operacionin e shpëtimit. Bashkëshortja e njërit prej kuzhinierëve i ka thënë gazetarëve se kishte marrë një telefonatë nga i shoqi që i thoshte: “Nuk marr dot frymë, do të digjemi të gjithë si minjtë këtu brenda, Zoti na shpëtoftë!”

Ndërkohë, një pasagjer ka komunikuar me televizionin grek Mega, të cilit i rrëfeu se janë jashtë dhe bën tmerrësisht ftohtë. Anija, tha ai, është e mbushur me tym dhe vazhdon të digjet, dyshemeja përvëlon, poshtë kabinave zjarri kërcet që prej orës 5 të mëngjesit, erdhën disa barka të na marrin e u kthyen mbrapsht, nuk na ndihmuan dot.

Mësohet se shumica e pasagjerëve të nxjerrë prej tragetit janë transferuar në anije të tjera pranë tij, ndërsa ata në gjendje më të rëndë shëndetësore janë dërguar menjëherë në spital. Në mesin e atyre që po trajtohen për hipotermi janë edhe tre fëmijë dhe një grua shtatzënë.

Nuk dihet ende me siguri se çfarë e shkaktoi zjarrin. Carlo Visentini, shefi ekzekutiv i grupit Visentini që e ka tragetin në zotërim, pretendon se kohët e fundit anija e kishte kaluar testimin teknik, pavarësisht një problemi të lehtë me njërën prej dyerve të emergjencës nga zjarri. Prokuroria e Barit ka nisur një hetim mbi çështjen me dyshimin se incidenti është pasojë e gabimeve njerëzore.

Top Channel