Presidenti egjiptian: Na duhet një revolucion fetar

Me këto fjalë iu drejtua imamëve më të mëdhenj të Egjiptit, Presidenti Abdel Fattah el-Sisi, presidenti egjiptian i cili kërkoi që të luftohet ekstremizmi, gjatë fjalës së mbajtur me rastin e ditëlindjes së Profetit Muhamed, që këtë vit ishte më 1 janar.

“Na duhet një revolucion i vetes, një revolucion që do të përgatisë brezat e së ardhmes së afër të Egjiptit, brezat që vendi ynë do të ketë nevojë”, vijoi ai.

Ish-Ministër i Mbrojtjes, el-Sisi udhëhoqi grushtin ushtarak që rrëzoi Presidentin Mohamed Morsi, i dalë nga “Vëllazëria Muslimane” dhe i pari president i zgjedhur nga populli pas regjimit të Mubarakut.

“Është e patolerueshme që gjithë bota islamike të shihet në sytë e botës si burim ankthi, rreziku, vrasjesh dhe shkatërrimi. Është e patolerueshme! Nuk po them vetë feja, po them gjithë realiteti”, vijoi presidenti egjiptian.

Mesazhi i el-Sisi është i fuqishëm për faktin se ai është udhëheqësi i njërit prej vendeve më të fuqishme me mazhorancë të theksuar të besimit islam në Lindjen e Mesme, pavarësisht se që prej periudhës së Mubarakut është përfshirë nga trazira të brendshme, që i kanë venitur disi rolin në politikën e jashtme.

Megjithatë, për analistët dhe njohësit e politikave në Lindjen e Mesme, më shumë se sa një mesazh për revolucion alla-luterian, fjalimi i presidentit egjiptian interpretohet si përpjekje për të forcuar pozitat e tij.

Të martën, Abdel Fattah el-Sisi vizitoi Katedralen më të madhe kopte në Kajro, ku të krishterët egjiptianë festuan Krishtlindjen.

Top Channel