Si (nuk) ngrohen shqiptarët

Ilda Leli ëshë një grua e ve në kryeqytet, e cila përdor gazin për t’u ngrohur, por ama vetëm një orë në ditë: “Nuk e mbaj shumë ndezur pasi nuk e ndjej të ftohtin. Në darkë unë futem në krevat me një shishe me bidon me ujë të ngrohtë te këmbët.”

Ilda na tregon se varianti i bidonit është me kosto të ulët dhe efikasitet të madh ndaj dhe përdoret në masë: “Kam një shoqe që futet që në orën 6 në krevat dhe sheh televizor me shishen e ujit te këmbët.”

Vasilika dhe Dhimitër Dashi, një çift pensionistësh madje e kanë pësuar nga bidoni: “I ka qëlluar një herë bashkëshortit, i është hapur shishja. Pastaj bleva një jastëk me korrent dhe nuk e përdor më shishen.”

Ata gjatë ditës ngrohen nga një reflektor të cilit i ndezin vetëm njërën rezistencë. Ndërkohë që mbështjellja me batanije është mënyra kryesore e ngrohjes, veçanërisht gjatë pasdites. Kanë provuar dhe batanijet me korrent, por ato u janë prishur shpejt.

Në këto ditë të ftohta, pensionistët kanë vendosur të flenë në të njëjtin ambient ku rrinë gjatë ditës: “Ngaqë këtu është shumë ngrohtë, nuk lëvizim fare.”

Kondicionerin nuk e ndezin për të mos harxhuar dhe për ngrohje shpenzojnë rreth 3 mijë e pesëqind lekë. Në këtë familje me fëmijë të vegjël, shpenzimet janë dyfishi e mos më tepër.
Gjyshja tregon: “Ngrohemi me reflektor dhe kondicioner. Gjysmë ore e ndezim kondicionerin, sa të ngrohet pak. E fikim pasi paguajmë shumë pastaj.”

Ndërkohë, fjetja vazhdon të jetë me të njëjtën praktikë: “Mbushim nga një shishe me ujë të ngrohtë dhe e fusim te krevati i fëmijëve.”

Soba me dru është një tjetër alternativë për ngrohje, veçanërisht në qytete ku këto temperatura janë të zakonshme. Në një familje në Korçë, ky është i vetmi mjet ngrohjeje, por me orare të përcaktuara: “E përdorim me kursim, e ndezim natën dhe në mëngjes.”

Violeta nga Kamza nuk ka mundësi të blejë një sobë drush. Kushtet e vështira ekonomike nuk e kanë lënë të përfundojë as ndërtimin e shtëpisë e cila fut të ftohtë nga të gjitha anët: “Jemi 5 veta që futemi në batanije.”

Dhe dielli falas është jorgani më i volitshëm për ato minuta që shfaqet, një mundësi që nuk mund ta humbasë kurrsesi kjo familje e varfër: “Sa herë ka diell, ne dalim që të ngrohemi. Kur nuk ka, me batanije dhe shishe.”  
 
Për Violetën ajo është e vetmja mënyrë ngrohjeje ndërsa përgatit paketat e duhanit, nga shitja e të cilave mbijeton familja e saj.  

Top Channel