Maqedoni, arsimi parauniversitar kërcënon me grevë

Këtë vendim e ka marrë Këshilli i Sindikatës së Arsimit dhe Shkencës, pas dështimit të bisedimeve tremujore me zyrtarët e qeverisë rreth kërkesave të Sindikatës për përmirësimin e kushteve të mësimdhënësve.

“Konstatimi ynë është se bisedimet tre mujore me përfaqësuesit e qeverisë rreth kërkesave tona nuk kanë dhënë rezultate. Në këtë konferencë për media ishin të ftuar edhe zyrtarët e pushtetit por refuzuan të merrnin pjesë. Për shkak të mos pranimit të kërkesave tona, Këshilli i Sindikatës mori vendim që nga 20 janari të hyjë në fuqi greva e përgjithshme”, deklaroi Joakim Nedelkov, kryetar i SHASHK.

Drejtuesit e Sindikatës së Arsimit kërkojnë rritjen e pagave të mësimdhënësve për 25% dhe anulimin e gjobave për ta. Greva do të zgjasë deri në realizimin e këtyre kërkesave, ndërsa përfaqësuesit e Sindikatës i bëjnë thirrje pushtetit të mos ushtrojë presion për të penguar grevën.

“Greva do të jetë klasike, mësimdhënësit do të shkojnë në punë, por nuk do të mbajnë procesin mësimor. Kohëzgjatja e grevës nuk varet nga ne por nga pushteti. Greva nuk do të ndërpritet derisa nuk gjendet zgjidhje e pranueshme për kërkesat e Sindikatës”, shtoi Nedelkov.

Përkrahje për kërkesat e tyre, drejtuesit e Sindikatës në Maqedoni kanë marrë nga Konfederata Evropiane e sindikatave në arsim.

Top Channel