Mungesa e progresit, anulohet samiti i Astanas për Ukrainën

Ndërkohë që gjakderdhja vijon në përplasjet mes forcave qeveritare dhe rebelëve në rajonet lindore të Ukrainës, nuk shihet asnjë shenjë e mundshme se kur mund të parashikohet një përpjekje e re për takimin mes palëve të përfshira drejtpërdrejtë dhe fuqive të mëdha.

Udhëheqësit rusë, gjermanë dhe francezë ishin ftuar në bisedime këtë të enjte në kryeqytetin e Kazakistanit, Astana, prej Presidentit ukrainas Petro Poroshenko, për t’i dhënë fund konfliktit në lindje të vendit, i cili ka shkaktuar mbi 4700 viktima përgjatë 9 muajve të fundit.

Por, ministrat e Jashtëm të katër vendeve respektive njoftuan se bisedimet në Berlin gjatë së hënës dështuan të implementonin tërësisht marrëveshjen e paqes, ndaj dhe nevoja për të dakordësuar mënyrat se si të ofrohet ndihmë ndaj civilëve të bllokuar dhe si të bëhet lirimi i të burgosurve kërkon “më tepër punë në vazhdim”, përpara se të zhvillohet samiti.

“Dallimet në opinionet e gjithsecilit prej të pranishmëve e bënë të qartë se sa e vështirë është të bësh progres drejt një zgjidhjeje politike apo një samiti në Astana, nga e cila pritet shumë pasi po kaq të mëdha janë edhe përgatitjet për këtë takim”, tha ministri i Jashtëm gjerman, Frank-Walter Steinmeier.

Ministri i Jashtëm rus, Sergei Lavrov, tha se ishte rënë dakord mes të gjithëve se vetëm një armëpushim i përcaktuar qartë do t’i hapte rrugë liderëve të 4 vendeve të takoheshin në Astana.

Separatistët dhe forcat qeveritare fajësojnë njëri-tjetrin për shkelje të vazhdueshme të armëpushimit, që hyri teknikisht në fuqi më 5 shtator, si pjesë e një protokolli paqeje prej 12 pikash të nënshkruar në Minsk të Bjellorusisë.

Top Channel