Francë, përcillen viktimat e “Charlie Hebdo”

Familjarë dhe miq të viktimave bënë homazhe në nder të karikaturistëve Bernard Verlhac dhe Georges Wolinski, si dhe për një gazetar dhe agjentin e policisë të vrarë gjatë sulmit nga militantët islamikë.

Për Verlhac u mbajt një shërbim mortor privat në zonën periferike Montreuil, para se të përcillej për në banesën e fundit në Pere Lachaise, vendi më i njohur në Paris ku prehen shkrimtarë, artistë dhe kompozitorë.

Në këtë vend u mbajt po ashtu një ceremoni në nder të Wolinskit, edhe pse trupi i tij do të digjej.

Ndërkohë, miqtë dhe familjarët morën pjesë po ashtu në varrimin e gazetares Elsa Cayat dhe agjentit Franck Brinsolaro, që kishte për detyrë të ruante redaktoren e “Charlie Hebdo”, Stephane Charbonnier.

Turmat e mbledhura në Montruil duartrokitën gjatë kur arkivoli me trupin e Verlhac mbërriti për ceremoninë. Ata mbanin në duar vizatime dhe parulla me mesazhe.

Duke bërë homazhe në nder të tij, kolegia e Verlhac, Corinne Rey e cilësoi të ndjerin si “mbretin e shakave”. “Revista jonë do të jetojë, por do të jetë ndryshe. Ti nuk pate kurrë frikë nga asgjë dhe unë të siguroj se as ne nuk do të frikësohemi”, u shpreh Rey.

17 persona humbën jetën në sulmet e javës së kaluar, 8 prej të cilëve anëtarë të stafit të revistës, një vizitor dhe një mirëmbajtës i redaksisë.

Gjithashtu humbën jetën tre oficerë policie dhe 4 persona të marrë peng në një market hebre të kryeqytetit francez. Sulmi ndaj “Charlie Hebdo” u morr përsipër nga Al Kaeda jemenase, që deklaroi hakmarrjen në emër të profetit.

Top Channel