Obama në fjalimin e përvitshëm: Koha për të “kthyer faqen”, të ndihmojmë klasën e mesme
21/01/2015 00:00
E rëndë në Suedi, 30 vjeçari plagos me thikë tre gra të moshuara 19/04 19:00
Presidenti amerikan Barack Obama mbajti fjalimin e përvitshëm mbi gjendjen e vendit, i cili për të ishte i gjashti, ku u përqendrua te ekonomia, duke premtuar politika nga të cilat do të mund të përfitojnë të gjithë amerikanët.
“Hija e krizës ka kaluar dhe Shtetet e Bashkuara janë më të forta. Gjatë 5 viteve të fundit, bizneset tona kanë krijuar më shumë se 11 milionë vende të reja pune. Tani është në dorën tonë për të vendosur të ardhmen tonë”, tha presidenti amerikan.
Në një fjalim që ai e përshkroi si më të fokusuar në vlera sesa në politika, Obama deklaroi se Amerika kishte kthyer një faqe të re pas recesionit.
Presidenti amerikan tha se do të mbështes klasën e mesme, duke zgjeruar mundësitë për punësim dhe duke ndjekur politika që do t’i vinë në ndihmë kësaj klase. Ai u shpreh gjithashtu se Kongresi duhet të miratojë një ligj për t’i dhënë grave të njëjtat paga me burrat për punë të njëjtë.
Fjalimi i presidentit Obama përfshinte edhe planet për të ndërtuar një ekonomi konkurruese, duke përmirësuar infrastrukturën dhe duke ndihmuar rreth 9 milionë studentë për të ndjekur studimet.
“Ky plan është shansi juaj për t’u diplomuar gati për një ekonomi të re, pa peshën e borxhit” tha ai.
Në një politikë, e cila sipas mediave ndërkombëtare ka të ngjarë të kundërshtohet dhe ta përfshijë presidenti në një konflikt të drejtpërdrejtë me Kongresin e udhëhequr nga republikanët, Obama u zotua për të rritur taksat mbi të pasurit nga 23.8% në 28% dhe futjen e tarifave të reja për firmat financiare me asete mbi 50 miliardë dollarë.
Presidenti i Shteteve të Bashkuara gjithashtu i bëri thirrje Kongresit që të miratojë ligje më të forta për sigurinë kibernetike, në vazhdën e një vale sulmesh që kanë goditur kompani, madje edhe organet më të larta shtetërore amerikane. “Nëse nuk veprojmë, ne do ta lëmë kombin tonë dhe ekonominë tonë të cenueshme”, tha ai.
Obama foli edhe për politikën e jashtme, ku u shpreh se Amerika ka të drejtën për të vepruar në mënyrë të njëanshme në luftën ndaj terroristëve dhe i bëri thirrje Kongresit që të miratojë një rezolutë për të autorizuar përdorimin e forcës kundër ISIS. Ai mbrojti vendimin e tij të muajit dhjetor, ku kërkoi normalizimin e marrëdhënieve me Kubën dhe i bëri thirrje Kongresit për të hequr embargon mbi 50-vjeçare me këtë shtet.
Top Channel
