Rikthehet Superiorja, 2015-a starton me Tirana-Apolonia

Tirana, e përforcuar me 4 lojtarë në merkaton e janarit, ka një ndeshje të lehtë, të paktën në letër, pasi do të ndeshet me fierakët e vendit të fundit.

E shtuna do të rezervojë një tjetër ndeshje të rëndësishme, ajo mes Vllaznisë dhe Kukësit, e cila njihet ndryshe dhe si “Derbi i Veriut”.

Shkodranët e mbyllën 2014-n me statistika pozitive, 5 fitore dhe vetëm 1 humbje në 6 ndeshjet e fundit, ndërkohë që kuksianët e Artim Shaqirit e mbyllën si kampionë të dimrit.

Në të njetin orar me derbin verior, pra në orën 17:00, do të jetë dhe sfida mes Flamurtarit dhe Teutës, dy skuadra që do të kërkojnë ta nisin me këmbë të mbarë vitin 2015 dhe t’i largohen “zonës së ftohtë” të klasifikimit.

Sfida më interesante e së dielës do të jetë ajo mes Laçit dhe Partizanit, skuadër kjo që ka pretendime të qarta për titullin kampion. Skëndërbeu duket se do ta nisë me një ndeshje të lehtë vitin 2015.

Përballë korçarëve do të jetë ekipi i Elbasanit, i cili ndan fundin e renditjes me Apoloninë dhe ka vetëm 3 fitore në 18 javë kampionati. Të gjitha sfidat e Superiores do të transmetohen si gjithmonë, të shtunën dhe të dielën, në kanalet e Supersport.

Top Channel