Nis heshtja zgjedhore në Greqi

Liderët e dy partive rivale janë përqendruar në mitingjet e fundit elektorale tek grekët e pavendosur të cilët mund të bëjnë ndryshimin në rezultatin përfundimtar. Kryeministri Samaras ka rikujtuar edhe një herë paralajmërimet që vijnë nga huadhënësit për rrezikun e ditës së nesërme duke theksuar se megjithë masat e ashpra, ekonomia filloi të japë shenjat e para pozitive.

“Syriza po kërcënon të hedhë në erë të gjiitha sakrificat e popullit grek dhe të na çojë në një aksident që ne të gjithë duhet ta shmangim. “Aksidenti” Tsipras nuk duhet të ndodhë”, u shpreh Samaras.
 
Nga ana e tij, kreu i Syrizës, Aleksis Tsipras, ka ritheksuar se radikalët e majtë do të risjellin përsëri dinjitetin e Greqisë, do të rinegociojnë borxhin dhe reformat me huadhënësit e BE-së dhe FMN-së, duke u dhënë fund masave antipopullore.

“Nga e diela nuk do të flasin më në Greqi huadhënësit dhe përfaqësuesit e tyre. Të dielën flet populli grek dhe ai do të japë përgjigjen më të pastër. Dhe kjo përgjigje është fund memorandumit të ndihmës, fund nënshtrimit, fund shantazheve”, tha Tsipras.

Kreu i Eurogrupit Dajseblum, kancelarja Merkel dhe ministri gjerman i Financave Shcauble kanë sqaruar se cilado qeveri të dalë nga zgjedhjet do të duhet të zbatojë progamin e reformave, por nga ana tjetër ministri francez i Financave ka deklaruar se eurogrupi do të diskutojë të hënën nëse qeverisë së re greke ndoshta do të duhet t’i jepet kohë për rifillimin e negociatave.
 
Sipas statistikave më të fundit, Greqia shkon në këto zgjedhje kur borxhi i saj ka arritur në 321 miliardë euro duke u rritur me gati 55% nga fillimi i krizës, ndërsa PBB-ja ka rënë nga 236 miliardë euro në 180 miliardë brenda pesë vitesh.

Sondazhet e fundit i japin Syrizës mbi 6.7% diferencë nga konservatorët dhe 33.4% të votave, duke lënë ende të paqartë faktin nëse do të sigurojë të paktën 151 nga 300 vendet e Parlamentit. Për vendin e tretë luftojnë ashpër AA-ja, partia e re Lumi, socialistët e Pasokut dhe Komunistët grekë.

Me interes të jashtëzakonshëm ndjekin mediat e huaja këto zgjedhje dhe mbi 350 gazetarë të huaj ndodhen në Athinë dhe qytetet e tjera të vendit.

Rezulatet e para zyrtare do të bëhen të njohura rreth orës 9 e 30 të mbrëmjes së të dielës.

Top Channel