Basha fton qytetarët në protestë: Të fikim 5 minuta makinat

Lulzim Basha i ftoi shqiptarët të bëhen pjesë e kësaj proteste jo për pushtetin, por për vete dhe mirëqenien e familjes së tyre: “Nesër, më 26 janar në orën 11.00, do të ndalojmë për 5 minuta makinat tona kudo ku jemi duke kundërshtuar skemën tiranike të qeverisë që shtrydh popullin deri në pikën e fundit. Përmes protestës do t’i tregojmë qeverisë se nuk mund të luajë si të dojë me fatet e njerëzve.”

Po pse nuk përfitojnë shqiptarët njësoj si europianët nga ulja drastike e çmimit të naftës në tregun ndërkombëtar? Lulzim Basha ka dy shpjegime. I pari është ekonomik: “Dy herë, në dy vitet e fundit, qeveria rriti taksën e qarkullimit. Mbi 60% e çmimit të naftës që paguajmë sot shkon në xhepat e qeverisë. Detyrohemi të paguajmë 1008 lekë taksat “Rama” në çdo litër karburant që blejmë. Kjo gijotinë në qafën e shqiptarëve me të ardhura 3 herë më të ulëta se mesatarja europiane është një krim që duhet ndalur.”

Shpjegimi i dytë pse çmimi i naftës në Shqipëri nuk ulet njësoj si në Europë dhe pse sipas Lulzim Bashës ekonomia po përkeqësohet është politik dhe ka në qendër kryeministrin Rama: “Sepse ky vend qeveriset nga një arrogant, cinik dhe rritës i pandalshëm taksash. Ky njeri ka vetëm axhendën e pushtetit personal e klikës së tij, axhendën e interesave të oligarkëve dhe botës kriminale që e rrethon.”

Protesta për çmimin e naftës nuk do të jetë e vetme. Për Partinë Demokratike koha e mbetur deri në 21 qershor nuk do të jetë vetëm sezon elektoral, por edhe sezon protestash antiqeveritare.
“Protesta e nesërme në oren 11.00 është vetëm hapja e një pranvere protestash të pandalshme, masive dhe popullore që s’kanë për ta lënë dyshen Rama-Meta të livadhisë sipas qejfit. Durimi ka një kufi. Nesër në orën 11.00 të fikim për 5 minuta makinat kudo ku jemi, të tregojmë dinjitetin e shqiptarit, forcën e shumicës për të mbrojtur familjen dhe vendin”, tha kreu i PD-së.

Top Channel