Nëntë foshnje të gjetura të gjalla nën gërmadhat e spitalit pediatrik meksikan të shkatërruar nga një shpërthim gazi do t’i nënshtrohen testeve të ADN-së, në mënyrë që të bashkohen me prindërit e tyre.
“Testimi është i domosdoshëm sepse bebet nuk i kishin në dorë byzylykët e tyre të identifikimit”, deklaroi kryetari i bashkisë së Meksiko Sitit, Angel Mancera.
Shpërthimi i së enjtes i mori jetën një infermiereje dhe dy fëmijëve, ndërsa 70 persona të tjerë mbetën të plagosur. Besohet se shkak i fatkeqësisë u bë rrjedhja e gazit nga një autoçisternë që ishte duke furnizuar spitalin.
Shumë zona të qytetit të Meksikos nuk kanë vende të posaçme furnizimi me gaz, ndaj dhe e vetmja mënyrë për ta dërguar këtë mjet të domosdoshëm në to është përmes transportit me kamionë.
Shpërthimi bëri që në ajër të ngrihej një top i zjarrtë. Ai ishte aq i fuqishëm saqë pjesa dërrmuese e ndërtesës u shemb.
Punonjësit e çisternës luftuan për rreth 15 minuta për të vënë nën kontroll situatën në vendin e ngjarjes, ku u formua edhe një re gazi.
Nënat brenda ndërtesës mbrojtën me trupin e tyre fëmijët nga shpërthimi. Shumë prej tyre u plagosën duke pësuar djegie apo çarje në fytyrë nga xhamat e thyer.
Skuadrat e shpëtimit kërkuan nën rrënoja dhe vetëm në orët e vona të së enjtes i mbyllën kërkimet duke deklaruar se nuk kishte më asnjë të bllokuar.
Kryebashkiaku Mancera deklaroi se një tragjedi edhe më e madhe u shmang pasi stafi i spitalit arriti të evakuonte shumë të shtruar përpara se rrjedhja e gazit të kthehej në shpërthim. Tre operatorë të çisternës së gazit janë arrestuar ndërkohë nga policia.
Top Channel