Basha: Të shpallet gjendja e jashtëzakonshme

“Prioriteti numër një i cdokujt sot duhet të jetë jeta e njerëzve, prona e tyre dhe normalizimi sa më shpejt i furnizimit me ujë, me ushqime dhe me çdo masë që të mos ju ngordhë bagëtia”, shprehet kreu i PD-së.
 
Zoti Basha thote se Qeveria duhet te zhvendoset nga ekranet e televizioneve në terren për të kryer detyrën me mundësitë maksimale të shtetit, përfshirë shpalljen menjëherë të gjendjes së jashtëzakonshme.

“Burimet e shtetit duhet të jenë në dispozicion të qytetarëve të përmbytur kudo ku kjo ka ndodhur. Këtu nuk ka ardhur akoma askush. Mungesa e ujit të pijshëm, mbytja e bagëtive, përparimi i nivelit të ujit dhe futja e tij edhe më thellë në shtëpitë e banorëve përbëjnë një rrezik real dhe në përparim. Nuk e kuptojmë se përse Qeveria nuk ka shpallur akoma gjendja e jashtëzakonshme. Kjo është një gjendje e jashtëzakonshme, duhet shpallet si e tillë, Kryeministri duhet të marrë masat e plota. Të dislokohet numri i mjaftueshëm i burimeve për t’ju ardhur në ndihmë”, tha Basha.

Zoti Basha, i cili vizitoi komunën e përmbytur të Novoselës, në zonën e Vlorës u tregua i kujdesshëm të tregoje bashkepunimin e perfaqësuesve vendore të opozites me autoritetet qendrore për kapërcimin e situatës.

“Ne si opozitë jemi në krah të qytetarëve. Ju kërkojmë atyre që të bashkëpunojnë me autoritetet. Kemi dhënë garancinë se deputetët e PD, pushteti vendor do të bashkëpunojnë plotësisht, por Kryeministri duhet të zgjohet nga gjumi”, tha Basha.

Kreu i opozitës vizitoi edhe banorët e fshatit Ferras, ku pa nga afër problemet e tyre dhe bëri sërish thirrje për ndërhyrje dhe ndihma të menjëhershme nga qeveria.

Top Channel