Rreziku nga kafshët e ngordhura, nis klorifikimi dhe groposja

Ministri i Shëndetësisë, Ilir Beqaj dhe një grup specialistësh nga Instituti i Shëndetit Publik kanë vizituar këto zona si dhe kanë dhënë direktivat e duhura për dezinfektimin e tyre me klor menjëhere sapo të largohet uji.

“Bashkë me Drejtorinë e Shëndetit Publik, me Inspektoriatin Shëndetësor dhe me udhëheqjen profesionale të Institutit të Shëndetit Publik po ndjekim nga afër të gjithë zinxhirin e mundshëm të përhapjes dhe transmetimit të sëmundjeve ngjitëse. Për fat të mirë deri më tani nuk kemi asnjë rast të konstatura. Kemi marrë masat për të filluar furnizimin e nevojshëm me klor për të bërë të gjithë dizinfektimin e nevojshëm. Ndërkohë po bashkëpunojmë nga afër me shërbimin veterinar sepse do të fillojmë procesin e groposjes së bagëtive të ngordhura. Kam shpërndarë sot një manual udhëzues, që është përgatitur me ndihmën e Organizatës Botërore të Shëndetësisë për raste të ngjashme, që çdo DSHP, çdo kryetar njësie vendore ta ketë parasysh të gjitha proçedurat e groposjes së bagëtive”, deklaroi ministri Beqaj.

Nga të dhënat paraprake rezultojnë të ngrodhura rreth 3500 bagëti një pjesë e të cilave kanë nisur të groposen.

Sipas gazetarit Sokol Bregu, në Darzezë “gjendja vazhdon të mbetet e rënduar për shkak se është një tokë që mban tepër ujë dhe uji nuk është larguar ende”.

“Problem kryesor mbetet baza ushqimore e bagëtive. Ndihma ka patur, por sipas fshatarëve ato kanë qenë të pakta”, shtoi Bregu në lidhje telefonike.

Për ditën e premte janë parashikuar reshje shiu, që pritet të ndikojnë sërish në nivelin e ujit në zonat e përmbytura dhe po kështu në kohëzgjatjen e largimit të ujit prej tyre. 

Top Channel