Ukraina, Hollande: Nëse dështojmë shpërthen lufta

“Nëse propozimi ynë do të dështojë, skenari i vetëm është lufta”, ka thënë Hollande, duke lënë të kuptohet se marrëveshja e paqes mes BE, SHBA, Rusisë dhe Ukrainës është ende larg.

Duke folur nga Mynihu, ku po zhvillohet konferenca për sigurinë, edhe kancelarja gjermane nuk u shfaq shumë optimiste. “Pas bisedimeve të së premtes nuk mund të them se patëm sukses, por megjithatë përpjekja ia vleu”, deklaroi Merkel.

Ajo shprehu gatishmërinë e Gjermanisë për të forcuar sigurinë dhe rendin në Evropë në bashkëpunim edhe me Rusinë.

“Është thelbësore që të përballemi me sfidat ndërkombëtare, si asgjesimi i armëve të shkatërrimit në masë apo terrorizmi. Prandaj zgjidhjen duhet ta gjejmë së bashku dhe në këtë drejtim, bashkëpunimi me Rusinë është i mundur”, tha kancelarja.

Sa për luftimet në lindje të Ukrainës, ajo theksoi se kufijtë duhen respektuar dhe po ashtu edhe liria e popujve për të vendosur vetë mbi të ardhmen e tyre.

Merkel shtoi se Evropa në fushën e sigurisë dëshiron të punojë me Rusinë dhe jo të jetë kundër saj, duke kundërshtuar opsionin e dërgimit të armëve për palën ukrainase.

“Nëse është e vërtetë që zgjidhja nuk mund të jetë ushtarake, atëherë dërgimi i armëve nuk është zgjidhje”, theksoi Merkel.

Për momentin nuk dihen detajet e propozimit të paqes të bërë nga dyshja Hollande-Merkel për presidentin rus Putin, por mësohet se deri tani ajo është mbështetur nga presidenti ukrainas Petro Poroshenko.

Megjithatë, në konferencën e Mynihut, ku të pranishëm mes të tjerësh janë zv.presidenti amerikan Joe Biden dhe ministri i Jashtëm rus Serghei Lavrov, mbizotëron pesimizmi.

Ndërkohë, NATO, përveç se është e gatshme të çojë përpara linjën e re të aksionit, duke vendosur ekipe ushtarake të ndërhyrjes së shpejtë në kufijtë ukrainas, ka folur sërish për mundësinë e një përshkallëzimi ushtarak të situatës.

Top Channel