Shpërthimi i një bombule gazi në një librari në qytetin e Elbasanit ka shkaktuar një zjarr të përmasave të mëdha.
Fatmirësisht nuk ka pasur të lënduar nga shpërthimi apo nga zjarri, pasi libraria pozicionohej në bodrumin e një pallati dhe bizneset në katet e para kanë qenë të mbyllura për shkak të fundjavës.
Shpërthimi i fuqishëm është lajmëruar nga banoret e pallatit, të cilët fillimisht kanë dyshuar për lëndë eksplozive në ndonjërën nga filialet e bankave që ndodhen në këtë ndërtesë. Por më pas, re të mëdha tymi dhe flakësh kanë përfshirë librarinë, duke rrezikuar për disa minuta edhe filialin e bankës.
Ndërhyrja e menjëhershme e zjarrfikëseve bëri të mundur lokalizimin në kohë të flakëve dhe më pas fikjen e tyre.
Mësohet se bombula e gazit përdorej për ngrohje nga pronari i librarisë. Shpërthimi i fuqishëm ka dëmtuar derën kryesore dhe muret e librarisë, por fatmirësisht në rrugë në momentin e shpërthimit nuk ka patur kalimtarë. Zjarri ka shkaktuar vetëm dëme të shumta materiale.
Top Channel