Italia mbështet shtetin e pavarur të Palestinës… në një votim jodetyrues

Vende të shumta europiane kanë nisur të bëhen tepër kritike ndaj Izraelit, teksa shteti hebraik, që pas dështimit të bisedimeve të fundit të ndërmjetësuara nga SHBA-të të prillit të kaluar, ka anancuar me programin e ndërtimit të blloqeve të banimit në territore që palestinezët i kërkojnë si pjesë e shtetit të tyre.

Dhoma italiane e Deputetëve votoi me 300 vota pro dhe 45 kundër, duke miratuar një mocion të sjellë nga Partia Demokratike e kryeministrit Matteo Renzi.

E ndërsa shumica e shteteve të zhvilluara e njohin Palestinën si një shtet, një pjesë e mirë e qeverive europiano-perëndimore nuk e kanë bërë ende diçka të tillë, duke mbështetur pozicionet e Izraelit dhe Shteteve të Bashkuara se krijimi i një shteti të pavarur palestinez duhet të bëhet realitet pas negociatave me Izraelin.

Votimi simbolik i së premtes nuk ndryshon aspak qëndrimin politik të qeverisë italiane, që ashtu si vendet e tjera europiane mbështesin ende zgjidhjen e negociuar dyshtetërore.

Irlanda, Britania dhe Franca kanë zhvilluar votime të ngjashme në Parlamentet e tyre gjatë fundit të vitit të kaluar, ndërkohë që Suedia ka hedhur një hap më tej, duke e njohur zyrtarisht Palestinën. Palestinezët kërkojnë një shtet të pavarur në Bregun Perëndimor dhe Gaza, me kryeqytet në Jeruzalemin Lindor.

E ndërsa kufijtë e Gazës janë qartësisht të përcaktuar, territori i saktë që do t’i bashkohet kushtetueshmërisht Palestinës në Bregun Perëndimor dhe Jeruzalemin Lindor pritet të përcaktohet përmes negociatave me Izraelin, sërish për një zgjidhje dyshtetërore.

Top Channel