Meta: Doshi, pengues i të vërtetës

“Unë nuk habitem nga akuzat e deputeti Tom Doshi, sidomos pas vendimit të grupit parlamentar të Partisë Socialiste për përjashtimin e tij.Unë them me bindje të plotë se nuk ekziston asnjë fakt dhe asnjë dëshmitar, i cili mund të provojë implikimin e Kryetarit të Kuvendit në një skenar të tillë. Përkundrazi, jam i bindur që ekzistojnë shumë dëshmitarë, të cilët provojnë versionin e parë dhe origjinal që porositës dhe pagues, sipas zotit Doshi, ishte kunati i zotit Berisha, zotit Agim Rama me qëllim destabilizimin politik të vendit për llogari të Berishës dhe fajësimin e Kryetarit të Kuvendit”, tha Meta.

Nga selia e Kryesisë së Kuvendit, Meta, qetësisht ka shpjeguar hapat e ndërmarrë që nga moment kur është vënë në dijeni nga deputeti Doshi.

“Unë në cilësinë e Kryetarit të Kuvendit jam takuar me ministrin e Brendshëm, me Prokurorin e Përgjithshëm, takime këto edhe në praninë e Kryetarit të Komisionit për Sigurinë Kombëtare, z. Braho, i cili bëri dje një deklaratë në respekt të opinionit publik dhe kam kërkuar marrjen e masave për zbardhjen e gjithë kësaj historie dhe vendosjen e personave të dyshuar përpara përgjegjësisë. Në dijeninë time, deri dje i vetmi person që ka penguar zbardhjen e kësaj çështjeje rezulton të jetë deputeti Tom Doshi”, tha Meta.

Kryeparlamentari tha se Doshi ka ndryshuar deklarimet e tij, se kush ishte pororitësi eleminimit fizik.

“Eshtë e drejta e deputetit në fjalë, t’i ndërrojë versionet e atentatit ndaj tij, çdo 6 muaj, sipas interesit të tij politik. Pjesën serioze të kësaj çështje e kam konsumuar prej 5-6 muajsh. Kam kërkuar të bëhen hetime, të zbardhet kjo çështje, të merret në mbrojtje e dy deputetëve, sepse kam qenë realisht i shqetësuar”, tha Meta.
 
Meqënëse nuk munguan komentet nga kampi opozitar me protagonist ish-Kryeministrin Berisha dhe kreun e PD-së, Lulzim Basha për këtë të fundit Meta dha një sugjerim.

“Vetëm se kam një këshillë për kryetarin formal, që të jetë i kujdesshëm në deklaratat e tij, sepse zoti Doshi me sa duket e ka gjithmonë një atentat në mendje, por i ndryshon vazhdimisht versionet dhe porositësit. Përpara gjashtë muaj porositës ishte kunati i Doktorit, dje porositës dhe pagues dola unë. Por kam frikë se porositësi tjetër i radhës mund të jetë kunati i kryetarit formal të Partisë Demokratike. Nuk shqetësohem aspak për garën e paparë që ka nisur mes Doktorit dhe Lulit për të shprehur dashurinë dhe kujdesin ndaj zotit Doshi”, tha Meta.

Top Channel