Kinë, kryeministri prezanton objektivat për ekonominë

Duke folur përpara Kongresit Kombëtar të Popullit, Li deklaroi se Kina do të synojë një rritje ekonomike prej rreth 7 përqind gjatë vitit 2015. Me elementët tradicionalë të rritjes që po dobësohen, tha ai, nevojiten më shumë reforma strukturale për të ecur përpara.

Duke e cilësuar ndotjen e ambjentit një “plagë” për cilësinë e jetës, shefi i qeverisë tha se ligjet ambjentale do të përforcohen.

Rreth 3 mijë ligjvënës nga e gjithë Kina u mblodhën për të ndjekur seancën e hapjes së sesionit vjetor në Dhomën e Madhe të Popullit në Pekin.

Kina e cilëson Kongresin Kombëtar të Popullit si organin suprem të pushtetit. Kjo strukturë ka kompetenca të shfuqizojë dhe të ndryshojë legjislacionin. Në praktikë, ai konsiderohet “vula” e Partisë Komuniste në pushtet.

Fjalimi tradicional i kryeministrit hap zyrtarisht sesionin, që përfundon më 15 mars. Rreth 30 nga 38 faqe të fjalimit të Li kishin në fokus ritmet e ngadalësuara të ekonomisë.

Ai u përpoq të qetësonte të pranishmit duke thënë se parashikimi prej 7 përqind i rritjes ekonomike është diçka normale dhe se niveli do të kthehet në objektivat e duhur brenda pak vitesh.

Por më i ndjeshëm kryeministri duket se u tregua ndaj ndotjes së ambjentit, një çështje që ai e cilësoi “plagë në jetën e përditshme të popullit dhe një problem që rëndon në zemrat e tyre”.

Më tej, Li vijoi me një listë të gjatë premtimesh, nga mbrojtja e pyjeve tek promovimi i makinave elektrike.

Top Channel