Basha: Ky, 7 Marsi më i keq për mësuesit

“Mësuesit shqiptarë janë sot nën një trysni të vazhdueshme nga qeveria, nën një pasiguri permanente që ka krijuar terror dhe ka hequr qetësinë e nevojshme që ata të ushtrojnë profesionin. Testimi i tyre, sipas tekave të qeverisë, nuk është gjë tjetër vetëm se një mjet për të larguar masivisht mësuesit nga puna, dhe për të krijuar vende për militantët e pushtetit”, Basha shkruan në Facebook.

Më tej, kreu i demokratëve thotë se në krye të drejtorive arsimore janë vendosur militantë partiakë pa asnjë lidhje me arsimin dhe me vlerat e edukimit. Basha sjell në kujtesë edhe rastin e korrupsionit dhe të favoreve seksuale që kërkonte ish-drejtoresha rajonale e Lushnjes, e cila ndodhet në gjykim për këtë çështje.

Kjo është vetëm njëra prej shumë të këqijave në sistemin arsimor, sipas kreut të opozitës.

“Prej gati dy vitesh paga e tyre nuk rritet. Prej dy vitesh ka vetëm marifete e mekanizma shtypjeje e shantazhi për të vështirësuar jetën e tyre. Prej dy vitesh nuk ka një investim të vetëm në insfrastrukturë e krijim kushtesh për të rritur cilësinë në mësimdhënie”, shton më tej ai.

Kreu i Partisë Demokratike e mbyll urimin me zotimin se opozita do të vijojë të jetë gjithmonë në krah të mësuesve.

“Ky është 7 Marsi më i keq për ta, por shqiptarët dhe mësuesit e tyre do të dinë ta ndalin të keqen”, mbyll Basha komentin e tij.

Top Channel