OKB, plan për refugjatët nga Siria. Nga 4 vitet e konfliktit, shumica ikën drejt Italisë

Në prag të përvjetorit të katërt të fillimit të konfliktit sirian, si edhe në kohën kur shifrat e emigrantëve të paligjshëm kanë shënuar rekord, OKB ka gjetur mbështetjen edhe nga Bashkimi Europian për këtë politikë të re.

Më shumë se 2/3-tat e refugjatëve zbarkuan në Itali, 1,5 milionë e tyre i janë drejtuar Turqisë, ndërsa pjesa tjetër vendeve të Mesdheut. Pas mbërritjes së tyre në kontinentin e vjetër, ata kanë nisur procedurat për kërkimin e azilit.

Por propozimi i Kombeve të Bashkuara është gjithashtu edhe një largim nga politika aktuale e unionit, e cila i detyron azilkërkuesit që të aplikojnë për azil vetëm në vendin e parë të hyrjes, e gjithë kjo bazuar në procedurën e njohur si “ligji i Dublinit”.

Ndërkohë, një tjetër nismë e OKB-së është edhe hapja e një ekspozite në Nju Jork me pamje tronditëse që shfaqin një pjesë të torturave siriane. Fotografitë që tregojnë viktimat e mizorive kanë për qëllim të tregojnë se, kriza humanitare në Siri nuk është edhe aq larg sa një pjesë e madhe e njerëzve mendon.

Katër vjet pas fillimit të luftës civile të Sirisë, më shumë se 3,5 milionë njerëz kanë ikur nga vendi i tyre dhe janë regjistruar në kampet e refugjatëve, ndërkohë 220 mijë kanë aplikuar për azil politik në Europë, duke bërë që ndikimi i krizës së Sirisë të kalojë kufijtë e Lindjes së Mesme.

Shumë vende të tjera të Perëndimit janë gjendur papritur përballë situatës, kur i është dashur të kthehen në strehën e mijëra refugjatëve.

Top Channel