SHBA, shqetësim për retorikën zgjedhore në Izrael

Gjatë fushatës elektorale, zoti Netanyahu deklaroi se nuk do të lejonte krijimin e shtetit të Palestinës nëse do të rizgjidhej.

“Ka qenë politika e Shteteve të Bashkuara për më shumë se 20 vjet që zgjidhja e konfliktit mes izraelitëve dhe palestinezët të jetë ajo dyshtetërore”, deklaroi zëdhënësi i Shtëpisë së Bardhë, Josh Earnest.

Ai theksoi se, administrata amerikane mund të rishikojë qasjen e saj ndaj Izraelit për shkak të komenteve të kryeministrit, se e përjashtonte krijimin e një shteti palestinez.

Zëdhënësi shtoi më tej se, presidenti Barack Obama ende nuk e ka uruar zotin Netanyahu për fitoren, por do ta bëjë këtë në ditët në vazhdim, pasi ai të mandatohet për të formuar qeverinë e re.

Netanyahu synon të formojë një koalicion të ri qeverisës brenda dy ose tre javësh, ka njoftuar partia e tij.

Përveç Shteteve të Bashkuara, edhe Kombet e Bashkuara dhe Bashkimi Evropian i kanë bërë thirrje kryeministrit hebre që të vazhdojë të ndjekë opsionin që ofron zgjidhjen e dy shteteve.

Zëdhënësja e OKB-së, Farhan Haq i bëri thirrje atij që qeveria e re izraelite të negociojë për një zgjidhje paqësore nga e cila do të krijohej një shtet i qëndrueshëm palestinez.

Ndërsa shefja e diplomacisë evropiane, Federica Mogherini e uroi Netanyahun për fitoren dhe bëri thirrje për rifillimin e procesit të paqes me Palestinën, i cili u ndërpre rreth një vit më parë.

Top Channel