Dy ditë para mbledhjes së përbashkët mes Qeverisë shqiptare dhe asaj të
Kosovës, bizneset e të dy vendeve kërkojnë prej tyre të lënë mënjanë
simbolikën dhe të marrin masa konkrete për të lehtësuar ekonomitë.
Agim Shahini i Dhomës Kombëtare të Tregtisë listoi disa nga 16 kërkesat që biznesi i drejton qeverisë për shqyrtim.
“Të pranohen dokumentet zyrtare të organeve kompetente të dy shteteve, si të doganave dhe të Dhomave të tjera kontrolluese të cilësisë; të trajtohen produktet e prodhuara në Shqipëri dhe në Kosovë, si produkte me prejardhje nga dy vendet tona”, tha Shahini
“Të heqim barrierat fiskale, të heqim TVSH-në, të bëjmë produktin ‘Made in Albania’ të konkurrojë Serbinë dhe rajonin. Po na mbyt Serbia me produktet e veta, se ne nuk jemi një grusht i fortë midis njëri-tjetrit”, thotë Donika Mici.
Edhe pse qeveritë e të dy vendeve janë angazhuar publikisht për lehtësira maksimale, bizneset thonë se po përballen me barriera absurde.
“Përshembull, një produkt që prodhohet në Durrës, në fabrikën e vajit dhe në Kosovë nuk pranohet prodhimi dhe kjo është për të dëmtuar shkëmbimet tregtare mes vendeve tona”, tha Shahini.
“Ka dëshirë, por nuk po përkthehet kjo gjë në lëvizje konkrete në masa konkrete, në produkte konkrete. Lëvizin më shpejt makinat në doganë, por procedurat janë prapë ato që kanë qenë”, thotë Luan Bregasi, drejtuesi i “Bussines Albania”.
Së bashku me 5 vende të tjera të rajonit, Shqipëria dhe Kosova janë pjesë e marrëveshjes CEFTA, që rregullon tregtinë e lirë mes tyre. Por biznesi kërkon që të dy vendet të kenë një bashkëpunim më të ngushtë ekonomik dhe të mos qëndrojnë në të njëjtat pozita si vendet e rajonit.
Top Channel
