Aleksis Tsipras viziton sot Berlinin

Tsipras do të diskutojë me kancelaren gjermane një listë paraprake me reforma strukturore që i kanë kërkuar partnerët Greqisë për të zbatuar, në mënyrë që të lejojnë më pas financimin e mëtejshëm të shtetit grek.
 
Midis tyre thuhet se janë ndryshime strukturore në funksionimin e sistemit politik, një sistem i ri taksash nën shembullin e Gjermanisë, një plan i veçantë për privatizimet në funksion të zhvillimit ekonomik dhe hapjen e vendeve të punës, ndërsa do të kërkohet ndihma e Berlinit për luftën ndaj evazionit fiskal dhe korrupsionit.

Sipas burimeve pranë kryeministrit grek, Tsipras do të hedhë në tryezë edhe çështjen e dëmshpërblimeve të luftës që ka hapur një seri polemikash në gjirin politik dhe mediatik të dy vendeve.

Sipas “Financial Times”, “Zonja e Hekurt” e Gjermanisë e ka ftuar kryeministrin grek në Berlin pas një letre që ky i fundit i ka dërguar asaj në datën 15 mars, ku midis të tjerash i ka zbuluar gjendjen e keqe financiare të vendit. Nëse nuk i jepet Greqisë një ndihmë afatgjatë financiare, Athina, në fund të marsit, e ndodhur para dilemës se kë do të duhej të paguante, pagat dhe pensionet apo këstin e borxhit ndaj FMN-së, do të zgjidhte të parën, shkruhej në letrën e zotit Tsipras që publikon gazeta.
 
Takimit të sotëm i ka paraprirë takimi i së shtunës së dy ministrave të Jashtëm të të dy vendeve, që përjetojnë një nga periudhat më të këqia përsa i përket marrëdhënieve dypalëshe.

Në një gjest miqësie edhe tabloidi i verdhë ‘Bild’ që ka qenë “flamurtari” i klimës negative të krijuar në opinionin publik të Gjermanisë, ka qarkulluar sot me faqen e parë të shkruar në gjermanisht dhe greqisht duke i uruar mirëseardhjen kryeministrit grek Aleksis Tsipras, por edhe duke rishikuar nga një pozicion i ri moral çështjen e reparacioneve të Luftës së Dytë Botërore.
 

Top Channel