Frroku drejt arrestimit të dytë, votimi ditën e enjte

I dyshuar për një vrasje të 16 viteve më parë në Belgjikë, Mark Frroku është vendosur sërish nën hetim nga organi i akuzës, akuzë të cilën ai e mohoi kategorikisht në të parën deklaratë për këtë ngjarje përpara kolegëve të parlamentit.

“Nuk kam qenë fare në Belgjikë në atë kohë kur thuhet. Kam udhëtuar në vendet e zonës Shengen lirshëm dhe kjo është lehtësisht e verifikueshme nga sistemi TIMS. S’ka asnjë kërkesë ndaj meje”, deklaroi Frroku.

Ashtu si edhe në rastin Doshi, opozita replikoi me prokurorët e çështjes duke ngulmuar në provat që organi i akuzës mbështet këtë kërkesë dhe përse ngjarja referohet shumë vite më pas.

Deputeti i Shkodrës ka sqaruar edhe një tjetër të dhënë të publikuar në media, sipas të cilave familja e tij dhe e viktimës janë takuar për këtë ngjarje.

“Është e vërtetë se familjarët tanë, në bazë të së drejtës zakonore kanë pasur një takim, jo ai që ka dalë në media, dhe është sqaruar kjo punë sepse ata kishin ankesat e tyre dhe babai im, thashë edhe njëherë, është 85 vjeç, dhe u është përgjigjur atyre me të drejtën zakonore”, deklaroi Frroku.

Seanca e pyetjeve me deputetin Frroku është zhvilluar e qetë përgjatë komunikimit të tij me kolegët, ndërsa nuk ka qenë i tillë raporti i demokratëve me kryesuesin e seancës, Ilir Meta, të cilit që në fillim i kërkuan të tërhiqej nga drejtimi për shkak se, sipas tyre, kryeparlamentari ka konflikt interesi në këtë çështje.

Tonet e larta mes demokratëve dhe Metës paralajmërojnë një seancë të tensionuar parlamentare të enjten ku do të futet për miratim raporti i Këshillit për kërkesën për arrestim të deputetit të Pukës.

Mark Frroku kërkoi gjithashtu të jetë i pranishëm në seancë ku do të votohet kërkesa e dytë ndaj tij.

Top Channel