Prostitutat australiane mbrojnë profesionin e tyre

Përmes një nisme në rrjetet sociale me hashtag-un, “Faceofprostitution” ato publikojnë imazhe të vetes dhe rrëfejnë se kanë zgjedhur vetë këtë rrugë dhe nuk janë të penduara për këtë.

Gjithçka nisi prej 21-vjeçares Tilly Lawless, e diplomuar në histori. 21-vjeçarja iu kundërpërgjigj një shkrimi të publikuar në blogun e një reviste të njohur në Australi, që e përgjithësonte prostitucionin si të dëmshëm për shoqërinë dhe vetë punonjëset e këtij sektori.

Menjëherë pas kësaj, kryetarja e Shoqatës së Punonjëseve të Seksit në Australi, Scarlet Alliance mori në telefon Tilly-n duke e pyetur nëse ishte e vendosur për të publikuar hashtag-un të shoqëruar me foto edhe në rrjetet e tjera sociale.

Kaq mjaftoi dhe menjëherë, kryesisht në Tëitter qindra-mijëra prostituta iu bashkuan nismës dhe publikuan foto të tyre.

“U habita shumë sepse punonjëset e seksit rrallë shihen si persona, si individë. Shumë përflitet dhe shumë e kanë pranuar për një rreth të ngushtë miqsh, por të publikosh foto në rrjetet sociale….është e fuqishme, shumë e fuqishme”, thotë Tilly, nismëtarja e kësaj fushate.

Synimi i fushatës është ndërgjegjësimi i shoqërisë australiane se prostitucioni nuk është ajo që shpesh u propagandohet, me vajza të dhunuara, sidomos nga Europa Lindore.

“Ne e kemi zgjedhur vetë këtë profesion dhe realiteti ynë është krejt ndryshe nga ai i vajzave të trafikuara”, thotë Tilly.

Në Australi prostitucioni është i ligjshëm, me një diferencë të vogël mes lindjes dhe perëndimit. Në lindje lejohen shtëpitë publike, ndërkohë që në perëndim, pavarësisht se prostitucioni është i ligjshëm, nuk lejohen shtëpitë publike dhe aktiviteti nuk është i rregulluar me ligj.

Top Channel