Arben Frroku u çlirua nga akuzat në Gjykatën e Krimeve të Rënda duke marrë pafajësinë në ditën kur vëllait të tij, deputetit Mark Frroku, i nis një tjetër proces gjyqësor për të cilin gjykata i dha masën e sigurisë “arrest me burg”.
I akuzuar nga drejtësia belge për një vrasje në këtë shtet, Mark Frroku do të përballet me procesin gjyqësor, por ç’do të bëhet me mandatin e deputetit që ai mban?
Ligji parashikon këto mundësi: heqjen e mandatit nëse për një periudhë 6-mujore nuk paraqitet në Kuvend ose nëse ai shpallet fajtor në vendimin përfundimtar të të gjitha shkallëve të gjyqësorit.
Nëse ndodh një nga këto dy variante dhe Mark Frrokut i hiqet mandati i deputetit, ai i kalon vëllait të tij, Arben Frrokut. Në listën shumëemërore të kandidatëve të Partisë Kristian Demokratike, pas Mark Frrokut vjen Arben Frroku, i shpallur i pafajshëm nga Gjykata e Krimeve të Rënda.
Por, gjithsesi zgjidhja e çështjes së mandatit që aktualisht e mban Mark Frroku nuk do të jetë kaq e shpejtë, pa i dhënë përgjigje së pari akuzave ndaj tij.
Top Channel