Heqja e vizave, Kosova drejt finalizimit të kritereve

Për të koordinuar përmbylljen e këtij procesi, Presidentja Atifete Jahjaga ka takuar ndaras ministrin e Punëve të Brendshme, atë të Drejtësisë dhe atë të Integrimit Europian.

Adrian Prenkaj, këshilltar për integrime europiane i Presidentes Jahjaga, ka konfirmuar për Top Channel se më 20 prill do të vlerësohen punët e kryera.

“Jemi në fazën e fundit të përmbushjes së kritereve të mbetura në dialogun për liberalizim të vizave. Presidentja Jahjaga do të thërrasë më 20 prill takimin e radhës të Këshillit Kombëtar për integrim europian, ku do të vlerësohet progresi i deritanishëm, si dhe hapat e ardhshëm në përmbylljen me sukses të këtij procesi”, ka deklaruar Prenkaj.

Pas përmbushjes së kritereve teknike, mbetet që Bashkimi Europian të marrë vendimin politik për datën e heqjes së vizave për kosovarët.

Krahas këtij procesi, Prenkaj tha se kryetarja e shtetit po koordinohet me të gjitha institucionet edhe për përmbylljen e Marrëveshjes së Stabilizim-Asociimit.

“Kosova së shpejti pritet të nënshkruajë edhe Marrëveshjen e Stabilizim Asociimit, që është hapi i parë në procesin e integrimit europian. Ajo pritet të nënshkruhet në fillim të verës së këtij viti”, ka thënë Prenkaj.

Pas liberalizimit të vizave dhe MSA-së, sipas Prenkajt, Kosova do të aplikojë për anëtarësim edhe në Këshill të Europës dhe kjo, sipas këshilltarit të presidentes, do të bëhet në përputhje me strategjinë e vendit për anëtarësimin në organizatat ndërkombëtare.

Top Channel