Moti me dëborë, në Korçë rikthehet dimri
07/04/2015 00:00
Rindërtohet spitali i Mirditës, Rama: Do shërbejë për 50 mijë banorë! 18/04 08:08
Një dimër i dytë është rikthyer në qarkun juglindor të vendit, ku bora ka zbardhur qytetet dhe gjithë akset. Trashësia maksimale e borës është regjistruar në Dardhë, ku ka arritur 20 cm, ndërsa në Voskopojë në 15 cm.
Përveç dy fshatrave malore edhe në qytetin e Korçës dhe Ersekës, si dhe në aksin që i lidh ato, bora ka arritur trashësinë prej 10 cm.
Ndërsa më pak reshje ka pasur në Pogradec, ku sipas të dhënave janë regjistruar mesatarisht 6-7 cm borë. Mësohet se reshjet nuk kanë shkaktuar probleme në aksin Pogradec-Qafë Thanë, ku prania e borës ka qenë thuajse e papërfillshme.
Pavarësisht se duket sikur reshjet kanë mbuluar akset nacionale, nuk ka pasur probleme me qarkullimin dhe sipas raportimeve nga Drejtoria e Rrugeve, të gjitha akset janë të kalueshme pa zinxhirë.
Bora ka nisur rreth orës 2 të mëngjesit të së martës dhe ka vijuar pa ndërprerje, duke sjellë një ulje të ndjeshme të temperaturave.
Top Channel
