Grevë e kontrollorëve në Francë, kaos ajror në Europë
08/04/2015 00:00
Sulmet e Izraelit, ministri i Jashtëm Iranian: Një dështim i plotë, nuk shkaktuan asnjë dëm për ne 19/04 22:55
Kontinenti i Vjetër përgatitet për dy ditë kaosi ajror pas pezullimit të qindra fluturimeve prej një greve të kontrollorëve të trafikut ajror në Francë. Kompania “low cost” Ryanair anuloi mbi 250 fluturime, EasyJet 118 dhe ndonëse më të prekurat janë linjat me Britaninë, probleme parashikohen edhe në pjesë të tjera të Europës.
Greva e nisur sot vazhdon deri mëngjesin e së premtes. Ngërçi dëmton më së shumti familjet që kthehen nga pushimet e Pashkëve.
Ryanair njoftoi se është detyruar të lërë në tokë avionët e tij në disa aeroporte spanjolle, përfshirë ato të Barcelonës e Malagës, si dhe të Lisbonës në Portugali. Si më e cënuara nga kjo situatë, kompania “low cost” i cilësoi veprimet e kontrollorëve francezë “egoiste” dhe “tmerrësisht të padrejta”.
British Airways ka anuluar dhe ajo një duzinë fluturimesh e kërkoi ndjesë për shqetësimin e shkaktuar udhëtarëve. Në Francë, ajo që preket më shumë nga kjo situatë është Air France, që ka pezulluar gati 40% të fluturimeve të brendshme.
Greva ka në thelb të saj pretendimet e sindikatave të trafikut ajror se me rregullat e reja, kontrollorët francezë do të dalin në pension më vonë sesa homologët e tyre në të gjithë pjesën tjetër të Europës perëndimore.
Top Channel
