Bizneset shqiptare në Itali regjistrojnë mbi 30 mijë ndërmarrje

09/04/2015 00:00

Vazhdojnë të shtohen ndërmarrjet individuale të emigrantëve me banim në Itali, duke arritur kuotën prej 335 mijë.

Nga raporti i Dhomës së Tregtisë rezulton se, në çdo dhjetë ndërmarrje individuale, njëra është me pronar të huaj. Në radhitjen e shifrave, të parët janë marokenët me 64 mijë biznese, më pas kinezët, e të tretët emigrantët shqiptarë me 30 mijë e 700 biznese individuale.

Ndër to, shumica dërrmuese, 23 mijë janë në sektorin e ndërtimeve, shifër që i radhit shqiptarët të parët në këtë sektor.

Nga analiza e shifrave dhe e ecurisë së tyre, del se sipërmarrjet e të huajve kanë aftësi më të mëdha për të përballuar krizën në krahasim me ato italiane.

Krahasimi i numrit të sipërmarrjet e reja të hapur dhe ato që janë mbyllur gjatë vitit të kaluar konfirmon se edhe sistemi prodhues italian po hapet gjithnjë e më shumë ndaj të huajve dhe se sipërmarrjet i këtij lloji mbeten një prej rrugëve më të mira për integrim dhe kohezion social të të huajve.

Top Channel