Gjykata shpërfill kontrollin elektronik

Por, ndërsa për të kontrolluar personat me arrest shtëpie kostoja i shkon Policisë së Shtetit, shpërfillja e gjykatave për të aplikuar edhe këtë formë dënimi i kushton edhe Ministrisë së Drejtësisë dhe Drejtorisë së Burgjeve.

Prej një viti, punonjësit në Zyrën Qendrore të Mbikëqyrjes në Ministrinë e Drejtësisë, paraqiten në të tre turnet, por ata nuk kanë askënd për të mbikëqyrur.

Ilir Qafa, drejtor i Përgjithshëm i Shërbimit të Provës, shprehet: “Duhet gjetur mundësia që gjykatave t’ua sjellim në vëmendje këtë alternativë. Gjykatat duhen ndërgjegjësuar për shfrytëzimin e saj”.

Mbikëqyrja elektronike u aplikua në vendin tonë për herë të parë në vitin 2013, për masa sigurie dhe për disa autorë krimesh të lehta, të cilët dënohen me kusht dhe të cilëve u duhen kontrolluar lëvizjet. Por, në total i janë nënshtruar këtij kufizimi vetëm 8 persona. Pas Tiranës, ky mekanizëm u zgjerua më tej në të gjithë vendin, në mënyrë që jo vetëm të ndikonte në uljen e mbipopullimit në burgje, por edhe të shmangte lëvizjet e pakontrolluara të atyre personave që ishin me arrest shtëpiak.

Megjithatë, viti që lamë pas nuk shënoi asnjë verdikt nga gjyqësori.

“Nuk po merret në konsideratë një mjet i vlefshëm në funksion të sigurisë publike. Nga qershori i vitit 2014 nuk kemi aplikim të kësaj mase. Nuk e di pse ndodh kjo”, thekson zoti Qafa.

MNë 13 mars, Ministria e Drejtësisë zhvilloi një tryezë për këtë çështje, në të cilën edhe ministri i Drejtësisë apeloi për ndërgjegjësimin e gjyqtarëve.

Top Channel