Lëvizja Socialiste për Integrim ka zyrtarizuar pasditen e së mërkurës kandidatët për 15 bashki të vendit që do të përfaqësohen nga kjo forcë politike në kuadër të koalicionit të majtë në zgjedhjet e 21 Qershorit.
Në përfundim të mbledhjes së kryesisë, nënkryetari i LSI-së, Petrit Vasili ka renditur kandidaturat në fjalë. “Bashkë me kandidaturat tona, që do t’i paraqiten koalicionit, u përcaktua edhe programi elektoral”, ka deklaruar Vasili.
Më herët, në fjalën e tij para kryesisë, kryetari Ilir Meta e vuri theksin tek risia që sipas tij sjell mbajtja e zgjedhjeve lokale me reformën e re administrativo-territoriale, e cila sipas tij do ta shkëpusë pushtetin vendor nga vartësia politike.
“Reforma territoriale do të sjellë një qetësi të re dhe shërbim më të mirë ndaj qytetarëve. Për herë të parë pushteti vendor do të jetë real, konkret dhe krijues për t’i sjellë zhvillim komuniteteve”, deklaroi Meta.
Një tjetër risi sipas numrit dy të mazhorancës do të jetë barazia gjinore, e cila sipas tij do të jetë e pranishme në çdo këshill bashkiakë.
“Këto janë zgjedhje shumë të rëndësishme sepse do tregojnë vullnetin e mazhorancës për të respektuar votën e qytetarit. Vota e qytetarit është më e rëndësishme se rezultati, ndaj këto zgjedhje do të jenë pozitive për të gjithë”, tha Meta.
Pasi dha garancinë e tij për një fushatë zgjedhore transparente, kryetari i Kuvendit saktësoi se, në kuadër të koalicionit me PS kandidatët janë të përbashkët.
Kandidatët e LSI
Lezhë – Vikor Tusha
Gjirokastër – Zamira Rami
Berat – Petrit Sina
Kukës – Hasan Halili
Pogradec – Diana Mile
Përrenjas – Miranda Rira
Kuçovë – Selfo Kapllani
Bulqizë – Milaim Damazi
Cerrik – Altin Toska
Selenice – Kasëm Cene
Vorë – Luan Sallaku
Mallakastër – Shyqyri Kapllani
Skrapar – Nesim Spahiu
Delvinë – Rigels Balili
Kolonjë – Arben Malo
Top Channel