Netanyahu krahason Iranin me nazistët, kritika edhe ndërkombëtarëve

“Ashtu siç u orvatën nazistët të shkelnin me këmbë civilizimin e ta zëvendësonin me një ‘racë superiore’ teksa shkatërronin popullin hebre, ashtu po tenton dhe Irani të marrë në dorë drejtimin e të gjithë rajonit dhe të zgjerohet edhe më shumë, me objektivin e hapur të rrënimit të shtetit hebre”, tha Benjamin Netanyahu, kryeminister i Izraelit.

Kreu i ekzekutivit izraelit përfitoi nga rasti për të treguar edhe njëherë kundërshtimin e tij ndaj marrëveshjes së arritur në parim, mes 5 anëtarëve të përhershëm të Këshillit të Sigurimit të OKB-së plus Gjermaninë dhe Republikës Islamike, pakt ky që synon frenimin e ambicieve bërthamore të Teheranit.

“Në vend që t’i kërkojnë Iranit të zvogëlojë kapacitetet e tij bërthamore dhe të kushtëzohen prej tij me heqje sanksionesh në këmbim të fundit të agresionit, fuqitë botërore tërhiqen dhe çfarë bëjnë? E lënë Iranin me centralet e veta atomike, madje lejojnë që edhe t’i zgjerojë ato më vonë, pavarësisht veprimeve të Teheranit në Lindjen e Mesme e më gjerë. Atëherë unë pyes, a e ka nxënë bota mësimin, që i dha tragjedia e hebrejve e shekullit të kaluar”, u shpreh Netanyahu.

Fuqitë e mëdha po bëjnë rolin e të shurdhërit përpara turmave, që thërrasin shesheve të Iranit “vdekjes Amerikës, vdekje Izraelit”, shtoi gjithashtu Netanyahu. Komentet e tij erdhën vetëm pak orë, përpara se i gjithë Izraeli të ndalonte e të heshtte përballë sirenave, që gjëmuan për të shënuar kësisoj përvjetorin e çlirimit të kampeve naziste të përqëndrimit, 70 vjet më parë.

Top Channel