Irak, vritet ndihmësi i Saddamit, udhëheqës i kryengritjes sunite

Douri raportohet të jetë vrarë gjatë një operacioni ushtarak, sipas deklaratave të Raed al-Jubouri për “Reuters”, guvernator i provincës Salahuddin. Edhe rrjeti televiziv arab “al-Arabiya” shfaqi fotot e viktimës, i cili ngjante me al-Douri.

Gjithsesi, Khdhayer Almurshidy, një zëdhënës i ish-partisë Baath të Irakut, tha për një televizion irakian se raportimet nuk janë të vërteta. Al-Douri ka qenë një figurë e lartë e asaj partie.

Al-Jubouri tha gjithashtu se “një grup forcash sigurie shkuan për të rrethuar zonën gjatë operacionit dhe vranë të gjithë terroristët e kapur. Tre prej tyre ishin veshur me jelekë-bombë dhe hodhën veten në erë. Mes trupave ishte edhe ai i Dourit”.

Operacioni raportohet të ketë ndodhur në zonën Hamrin, pranë al Alamit në provincën Salahuddin, por forcat irakiane mësohet se nuk kanë qenë në dijeni për praninë e al-Dourit në vendngjarje.

Jubouri foli për “al-Arabiya” duke e përshkruar operacionin si një fitore madhore, pasi siç u shpreh ai, “al-Douri konsiderohej si truri i operacioneve të grupit terrorist që u sulmua”, që në fakt ishin pjesëtarë të Shtetit Islamik, një degë e ndarë nga al-Qaeda e që ka pushtuar territore të tëra në Siri dhe Irak.

“Sigurisht që kjo goditje do të ketë ndikim tek ata. Besoj se do të ketë përçarje mes tyre”, tha ai.

Top Channel