Jemen, sauditët u japin “fund” sulmeve, operacion për rikthimin e shpresës
21/04/2015 00:00
Përfundon seanca në Gjykatën e Lartë lidhur me pretendimet e ish Presidentit Trump për imunitet absolut 25/04 21:57
Koalicioni i udhëhequr nga Arabia Saudite, e cila ka ndërmarrë prej më shumë se 3 javësh sulme ajrore ndaj militantëve Houthi të mbështetur nga Irani në Jemen, ka njoftuar këtë të martë dhënien fund të operacionit ushtarak të mbiquajtur “Stuhia vendimtare” dhe nisjen e një operacioni të ri të quajtur “Rikthimi i shpresës”.
Lajmi u publikua përmes një deklarate të lexuar në televizionin shtetëror saudit “Arabiya TV”. Misioni i ri, sipas deklaratës, do të fokusohet tashmë në sigurinë brenda vendit dhe antiterrorizmin, te ndihmat humanitare, si dhe te gjetja e një zgjidhjeje politike në Jemen.
Ndërkohë, një zëdhënës saudit reagoi menjëherë pas këtij lajmi, duke thënë se koalicioni i udhëhequr prej sauditëve do të vazhdojë të ketë në shënjestër lëvizjet e grupit Houthi brenda Jemenit.
“Koalicioni do të vazhdojë të parandalojë lëvizjen e milicive Houthi, duke mos u lejuar ndërmarrjen e ndonjë operacioni brenda Jemenit”, tha Ahmed Asseri, gjeneral brigade.
Njoftimi i fundit sugjeron se fushata ushtarake e vendeve me shumicë muslimane sunite kundër rebelëve aleatë të Iranit, mund të vazhdojë edhe më tej, pavarësisht dhënies fund të sulmeve thuajse njëmujore.
Top Channel
