Maqedoni, protestë e nxënësve kundër reformave në arsim
23/04/2015 00:00
Përdhunuan një vajzë të mitur në Prishtinë, 62 vjet heqje lirie për gjashtë autorët 23/04 15:15
Mijëra nxënës të shkollave të mesme kanë marshuar rrugëve të Shkupit, për të kundërshtuar reformat e reja në arsim. Ata e kanë shprehur revoltën e tyre fillimisht para selisë së Qeverisë dhe më pas kanë ndaluar para godinës së Ministrisë së Arsimit.
“Kërkesat tona janë dy: të kthehet koncepti i vjetër për maturën shtetërore dhe të ndërpritet testimi ekstern, që ndikon në suksesin e përgjithshëm të nxënësve dhe po shërben për t’i gjobitur profesorët”, tha Aleksandra Filipova, nxënëse.
Organizatorët e protestave bënë të ditur se, për shkak të pakënaqësisë nga reformat e Ministrisë së Arsimit, rreth 20 mijë nxënës të shkollave të mesme janë duke bojkotuar procesin mësimor në të gjithë Maqedoninë.
Nxënësit paralajmërojnë radikalizmin e protestave, nëse autoritetet nuk marrin parasysh kërkesat e tyre.
“Ne duam ta informojmë ministrin se, nëse na injoron do të dalim çdo ditë të protestojmë, deri sa të na plotësohen kërkesat”, tha Fuad Ibrahimi, nxënës.
Ky është marshimi i tretë protestues kundër reformave, ndërsa ministri i Arsimit, Abdilaqim Ademi, ende nuk është takuar me të rinjtë për të dëgjuar vërejtjet e tyre. Protesta e nxënësve është mbështetur edhe nga disa profesorë dhe një numër i madh studentësh.
Top Channel
