F1, 21 vite pa Ayrton Sennan. Ja 5 garat më spektakolare të tij

1. 1984 – Çmimi i Madh i Monakosë, Montekarlo
Ishte gara, në të cilën për herë të parë u kuptua se Ayrton Senna ishte një pilot special, apo më saktë “mbreti i shiut”. Në Principatë, ai garoi nën rreshje të dendura e të stuhishme. Përplasjet, tërheqjet dhe incientet e shumta e bënë garën shumë më të vështirë nga zakonisht. Përfituan këtu ekipet e vogla dhe, nga fundi i klasifikimit, pasi ishte nisur nga vendi i 13, bënte përmbysjen e madhe një talent i ri me një makinë “Toleman-Hart”, në vitin e tij të parë në Formula 1. E gjithë kjo përmbysje u ndal në momentin kur braziliani iu afrua aq shumë vendit të parë, të mbajtur nga Alain Prost, sepse gara u ndërpre përpara kohe, pas vetëm 31 xhirosh të zhilluara, për shkak të pamundësisë për të garuar në pistë.

2. 1985 – Çmimi i Madh i Portugalisë, Estoril
Shënohet edhe fitorja e parë në Formula 1 nga Ayrton Senna, por në mënyrën më “kanibale” të mundshme. Braziliani, në garën e tij të dytë me skuderinë Lotus, fitonte garën duke parakaluar për së dyti të gjithë pilotët e tjerë, me përjashtim të Michele Alboreto, i cili përfundonte i dyti me Ferrarin e tij me më shumë se 1 minutë vonesë. Senna, i cili ishte nisur nga “pole position”, do të regjistronte edhe xhiron më të shpejtë në pistë, duke fituar të parin “Grand Chelem”, siç quhet triumfi i realizuar pasi ke siguruar “pole position”-in, fitoren, xhiron më të shpejtë dhe kryesimin e garë nga fillimi e deri në fund.

3. 1988 – Çmimi i Madh i Belgjikës, Spa-Francorchamps
Ky ishte sezoni i parë, në të cilin Prost dhe Senna duelonin për titullin kampion si shokë skuadre, dhe këtë e bënin me McLarenin. Në pistën e “Spa”, dy rivalët e përjetshëm do të niseshin nga vija e parë, me brazilianin përpara. Prost niset më shpejt dhe e parakalon Sennan në kthesën e parë, por braziliani nuk dorëzohet dhe rimerr kryesimin e garës, në përfundim të vijës së drejtë të “Kemmel”-it. Do ta merrte dhe nuk do ta lëshonte më kurrë deri në përfundim të garës, duke e mbyllur atë me një avantazh të madh, gjë që bëri të merrte edhe kryesimin e klasifikimit, duke parakaluar sërish shokun e skuadrës. Ky do të ishte edhe sezoni i titullit të tij të parë nga 3 të tillë.

4. 1991 – Çmimi i Madh i Brazilit, Interlagos
Fitorja e parë në shtëpi dhe tepër e djersitur. Një garë e çmendur, ku Senna, i cili qëndroi për një kohë të gjatë në krye të saj teksa ishte nisur nga “pole position”, arriti të triumfonte edhe pse me një problem të rëndë në marshin e makinës, i cili fillimisht u bllokua në të katërtin e më pas ngeci në të gjashtin. Probleme të rënda edhe për Mansell, i detyruar të tërhiqej kur ishte shumë pranë mundësisë për të vënë në rrezik Sennan. Braziliani kalon i pari vijën e “finish”-it. Për shkak të luftës së xhirove tëë fundit mes kampionit të botës dhe kambios, krahu i djathtë i brazilianit mbeti thuajse i paralizuar për shkak të sforcos së vazhdueshme. Në fund të saj, u ndihmua që të dilte nga njëvendëshja e tij dhe pati probleme në ngritjen e trofeut në majën e podiumit.

5. 1993 – Çmimi i Madh i Europës, Donington
Një garë befasuese nga fenomeni brazilian, i cili thuajse bën gjithçka në xhiron e tij të parë perfekte. Pasi kishte humbur një pozicion gjatë nisjes, Senna e pa veten i pesti, por brenda xhiros së parë erdhi edhe shpërthimi i tij, duke parakaluar radhazi Schumacherin, Ëendlingerin, Hillin dhe Prostin. Reshjet e shiut ishin të zakonshme në Donington, duke detyruar pilotët të bënin shumë ndryshime gomash, por Senna nuk e lë fitoren t’i ikë nga duart. Një tjetër rekord këtu, duke parakaluar për herë të dytë të gjithë pilotët, me përjashtim të Damon Hill, i cili u rendit i dyti me 1 minutë e 20 sekonda vonesë.

Top Channel