Jahjaga mbledh Këshillin e Integrimit: Kosova, ende larg liberalizimit të vizave

Ministri për Integrimin Evropian, Bekim Çollaku tha se ka ende shumë detyra për t’u përmbushur, dhe se ka ardhur koha që të gjitha institucionet e përfshira në këtë proces të japin maksimumin e tyre.

“Pa dashur të nënvlerësoj punën dhe rezultatet e arritura deri më tani, duke u bazuar nga të dhënat e nxjerra nga monitorimi i vazhdueshëm relevant, duhet pranuar se raporti në formën aktuale nuk rezulton me përmbushjen e kritereve të mbetura. Kjo situatë duhet të merret shumë seriozisht, prandaj duhet të shfrytëzojmë ditët dhe javët e ardhshme për të zbatuar kriteret e mbetura, të cilat janë të njohura për institucionet pjesëmarrëse në këtë takim”, tha Bekim Çollaku, ministër i Integrimeve Evropiane.

Përfaqësuesi i zyrës së BE-së në Kosovë, Samuel Zhbogar tha se procesi i liberalizimit të vizave duhet të kuptohet drejt.

“Ka një konfuzion sa i përket asaj, se çfarë do të thotë liberalizim i vizave. Liberalizimi nënkupton që qytetarët e Kosovës do të jenë në gjendje të udhëtojnë në zonën ‘Schengen’ për turizëm, për biznes. Kjo nuk do të thotë, që qytetarët e Kosovës mund të punojnë apo të studiojnë në Bashkimin Evropian. BE është e vetëdijshme për rëndësinë që ka liberalizimi i vizave për qytetarët e Kosovës. Këshilla ime për secilin nga ne është, të fokusohemi në çështjet që kanë mbetur pa u adresuar. Por dua të konfirmoj atë çfarë ka thënë Anapolus, se ju jeni në kilometrat e fundit të këtij procesi. Me më shumë punë mund të arrini te fundi”, tha Samuel Zhbogar, përfaqësues i zyrës së BE-së në Kosovë.

Presidentja Atifete Jahjaga, duke folur për këtë proces tha se institucioneve të vendit u mbetet të punojnë më me përkushtim dhe më me urgjencë për adresimin e pakënaqësive të qytetarëve, të cilat në këtë raport njihen si faktori, që nxit ikjen e qytetarëve drejt vendeve të Bashkimit Evropian.

Kryeministri Isa Mustafa tha se institucionet e vendit po tregohen të matura, duke kryer të gjitha detyrimet që u janë kërkuar nga BE-ja drejt këtij procesi.

Ndërsa kryetari i Kuvendit të Kosovës, Kadri Veseli tha se të gjitha institucionet duhet të punojnë aq sa të mos u lënë hapësirë institucioneve dhe zyrtarëve të BE-së për mos heqjen e vizave, duke u arsyetuar me atë se Kosova nuk po kryen detyrat e saj.

Top Channel