Studiuesit: Oqeani Arktik po hyn në një epokë të re

Pas hulumtimesh të zgjatura në terren, shkencëtarët norvegjezë paralajmërojnë se kalimi i gjendjes së mbulesës së akullt nga ajo e një shtrese të trashë tek një fashë e hollë që zhduket me trokitjen e verës, do të ketë pasoja afatgjata. Instituti polar norvegjez ka dërguar një ekspeditë në Arktik gjatë muajve më të ftohtë të vitit.

Për të parë se çfarë ndodh saktësisht atje, shkencëtarëve u është dashur të përballojnë temperatura ekstreme dhe errësirën e plotë. Qëllimi i kësaj nisme ishte grumbullimi i të dhënave mbi kushtet e akullit gjatë dimrit polar.

Një anije kërkimore, The LANCE, është dërguar në një zonë rreth 500 milje larg Polit të Veriut, ku ka kryer shpime në shtresën e akullit. Sipas drejtorit të Institutit, Jan-Gunnar Winther, matjet dhe informacionet e mbledhura mbi atë çfarë ndodh në këtë zonë gjatë dimrit ishin të një rëndësie jetike sa u takon përpjekjeve për të përmirësuar skenarët e ndryshimeve të klimës në të ardhmen.

“Nuk kishim pothuajse asnjë të dhënë mbi dimrin në Oqeanin Arktik, ndaj ky informacion është i një rëndësie të veçantë kur vjen fjala tek të kuptuarit e procesit. Ishim aty në momentet e ngrirjes së akullit në dimër dhe do ta shohim edhe kur të shkrijë në verë. Një epokë e re ka nisur, po shkojmë nga shtresa e akullit të vjetër tek akulli i ri dhe modelet e klimës që përdornim deri tani nuk e përfshinin një informacion të tillë. Me të dhënat aktuale mund të përmirësojmë modelet klimaterike e për rrjedhojë, edhe projeksionet e ndryshimeve globale të klimës”, ka thënë Winther.

Një prej objektivave kryesorë të ekspeditës është të shqyrtohen pasojat e faktit që sot në Arktik shtresa e akullit shumëvjeçar është tkurrur ndjeshëm dhe proporcionet e akullit të ri e më të hollë janë gjithmonë e më të mëdha.

Top Channel