Shkup, vazhdojnë protestat kundër qeverisë

Protesta u zhvillua para godinës së Parlamentit në Shkup, meqë forcat e shumta të policisë nuk i lejuan demonstruesit të protestojnë para selisë së qeverisë dhe ndërtesës së Prokurorisë Publike.

“Protestoj kundër të gjitha padrejtësive në shtet. Protestoj dhe kërkoj largimin e njerëzve që e drejtojnë shtetin në mënyrë jo të sinqertë. Unë bëj pjesë në kategorinë e qytetarëve që duan drejtësi”, shprehet një protestues.

“Protestoj për të kërkuar demokraci dhe liri. I mbështes të gjithë këta të rinj që kanë dalë këtu për të kërkuar drejtësi, paqe dhe liri”- shton një tjetër.

Protestës i ka paraprirë publikimi i bisedave të përgjuara të zyrtarëve qeveritarë lidhur me vdekjen e gazetarit Nikolla Mlladenov. Mllëfin e protestuesve e kanë shtuar akoma më tepër akuzat e opozitës në adresë të policisë për fshehjen e dëshmive të shumta në procesin hetimor për vdekjen e gazetarit të njohur maqedonas.

“Qytetarë të nderuar kudo që jeni, duhet të na bashkangjiteni sepse ky popull nuk mund të durojë më tepër. Ky popull nuk duhet të heshtë për vrasjet që i fshihte Qeveria e Maqedonisë dhe ministrja e Brendshme, Gordana Jankullovska”- bëri thirrje një protestuese.

Demonstratat në kryeqytetin e Maqedonisë po vijojnë për tre ditë me radhë. Protesta që u zhvillua mbrëmjen e së enjtes zgjati rreth tre orë dhe u mbyll pa incidente.

Paralelisht me protestuesit në Shkup, dorëheqje nga Gruevski kanë kërkuar edhe qytetarët e Prilepit dhe Strumicës.

Top Channel