Hollande në Havana, takohet me Fidel dhe Raul Castron

12/05/2015 00:00

Presidenti francez zhvilloi një vizitë historike në Kubë, ku u takua në Havana me liderët e revolucionit të vitit 1959, Fidel dhe Raul Castro.

Hollande u bëri thirrje Shteteve të Bashkuara t’i japin fund embargos tregtare me Kubën, e cila është vendosur që në vitin 1960. Ai tha se embargoja ka dëmtuar rëndë zhvillimin e shtetit ishullor. Ai e lavdëroi Barak Obamën për rolin e luajtur në heqjen e embargos tregtare ndaj kombit amerikano-jugor, duke e përshkruar këtë vendim si të një rëndësie kyçe për hapjen e Kubës ndaj pjesës tjetër të botës.

Hollande është i pari president i Francës që e viziton Kubën që nga viti 1898 dhe udhëheqësi i parë perëndimor që nga 1980-a. Shefi i Elizesë dhe Fidel Castro zhvilluan një takim rreth 60 minuta.

“Kisha para meje një njeri, i cili kishte bërë histori”, ka thënë pas takimit Hollande, i cili më vonë u takua edhe me vëllain e Fidelit dhe Presidentin aktual të Kubës, Raul Castro.

Nga Universiteti i Havanës, Hollande tha se Franca do të bëjë çmos për të siguruar heqjen e masave ‘që e kanë dëmtuar së tepërmi zhvillimin e Kubës’.

 

Top Channel