Deklaratat e Erdoganit shkaktojnë reagime: Të mos eksportojë problemet e politikës së tij

Duket se, të gjitha këto kanë dashur të kushtëzojnë palën shqiptare me mbylljen e shkollave të Gulenit, por një vendim i tillë ka pak ose aspak gjasa që të ndodhë.

Ky përcaktim dhe, mbi të gjitha kushtëzimi i paketës së financimeve, shkaktoi reagimin e akademikëve të rrjetit të shkollave me financime turke, që bëjnë pjesë në cilësimin e Presidentit Erdogan si “guleniste”, si dhe të studiuesve dhe të analistëve shqiptarë.

“Unë do ta konsideroja si një vizitë tejet politike. Ishte një deklaratë, zgjatim i konflikteve të brendshme turke”, tha Ferdinand Gjana, rektor i Universitetit “Hëna e plotë Beder”.

“Në një anë kemi një premtim të një prezence më të madhe turke, e cila duhet mirëpritur. Por, në anën tjetër, është e qartë që Shqipëria është një vend sovran, ku aspirata kryesore është përfshirja në Europën e bashkuar dhe njëkohësisht një vend, i cili duhet të ketë gjithnjë kujdes për sigurinë e tij të brendshme. Ndërkohë, pa e lejuar të importojë konflikte të tjera, që nuk janë tonat”, u shpreh studiuesi Pirro Misha.

“Politika e tyre ka qenë se, pavarësisht kush ka qenë në pushtet, ruajnë një politikë konstante të dhënies së ndihmave të pakushtëzuara. Sa u përket deklaratave, ishin të papritura dhe të tepruara, sepse nuk kanë lidhje me realitetin në Shqipëri”, deklaroi analisti Lutfi Dervishi.

Sipas tyre, lëvizja Gulen është një lëvizje civile dhe emri i saj nuk figuron në asnjë nga listat e OKB-së për organizatat terroriste.

“Lëvizja Gulen është një vlerësim i vlerave të Islamit, e cila është konform demokracisë. Përsa i përket termit terrorizëm, aktualisht në kohët moderne kemi ‘të drejtën ndërkombëtare’, konventat e Kombeve të Bashkuara, që e cilësojnë shumë qartë se kur diçka futet në këtë kategori. Deri më tani nuk kemi parë asnjë procedurë të tillë”, tha më tej rektori Ferdinand Gjana.

“Ç’është e vërteta, mua fjala terrorizëm më duket e tepruar, sepse fjala terrorizëm ka një kuptim të caktuar. Ashtu si në Kumanovë, edhe në këtë rast po përdoret gjithnjë e më shpesh. Por, këto ndoshta janë etiketime brenda një konteksti politik. Megjithatë, shteti shqiptar duhet të shohë interesin e tij. Nëse ka elementë që shkelin ligjin shqiptar, atëherë duhet të ndërhyjë. Në qoftë se këto shkolla kryejnë një veprimtari krejt normale, nuk më duket e vendit që, vetëm pse e kërkon një udhëheqës tjetër, të ndërhyhet, kur aty përfshihen edhe interesat e mijëra studentëve, familjeve që kanë paguar”, vijoi komentin e tij studiuesi Misha.

“Përdorimi i fjalës terrorist është i fundit që mund të përdoret dhe nuk është në tagrin e zotit Erdogan që ta përcaktojë se kush është terrorist. Duhet të ishte më i kujdesshëm ndaj bashkëbiseduesve, sepse djemtë e tyre kanë studiuar në kolegjet turke dhe kanë qenë në pozicione për të përcaktuar shumë mirë, nëse ka pasur dyshime për këto investime”, deklaroi analisti Dervishi.

Sipas studiuesit Misha dhe analistit Dervishi, Tirana zyrtare duhet të bëjë sa më shpejt të qartë qëndrimin e saj në lidhje me aktivitetin e lëvizjes Gulen në Shqipëri.

“Duke qenë vend aleat Turqia, nga më kryesorët, mendoj se është e detyrueshme që qeveria shqiptare, në një datë të përshtatshme t’ia bëjë të qartë publikut qëndrimin e saj. Ta bëjë të qartë sesi qëndron kjo çështje”, tha studiuesi Misha.

“Deri tani, politika ka qenë e qartë për ndihma vëllazërore dhënë popullit vëlla, ndihma pa kushte dhe tejkalimi i kësaj do të ishte një hap tjetër, për mendimin tim, i papranueshëm. Dhe ende nuk e kuptoj pse është ende i paartikulueshëm nga qeveria e Tiranës”, u shpreh Lutfi Dervishi.

 

Top Channel