Papa Françesku shenjtëron dy murgeshat e para palestineze
17/05/2015 00:00
Bie çmimi i naftës ndërsa zbutet tregu i punës në Shtetet e Bashkuara 25/04 07:55
Papa Françesku ka shenjtëruar dy murgesha të shekullit të XIX, të cilat kanë jetuar në Palestinën e sunduar prej Perandorisë Osmane, duke u bërë kështu të parat katolike arabe që kthehen në shenjtore.
Marie Alphonsine Ghattas dhe Mariam Bawardy janë mes 4 shenjtorëve të reja, që Papa Françesku zyrtarizoi nga sheshi “Shën Pjetër” i Romës, këtë të diel.
Presidenti palestinez, Mahmoud Abbas, si dhe mbi 2000 pelegrinë të krishterë nga rajoni kanë marrë pjesë në ceremoninë e shenjtërimit të tyre.
Lëvizja shihet si një mjet i mbështetjes së Vatikanit për komunitetet e krishtera drejt pakësimit në Lindjen e Mesme.
Të shtunën, Ati i Shenjtë u takua me Presidentin Abbas në Vatikan, duke e quajtur atë “një ëngjëll të paqes”.
Vizita e Abbas në Vatikan erdhi vetëm pak ditë, pasi Vatikani njohu zyrtarisht shtetin e Palestinës përmes një traktati, i cili thekson se Selia e Shenjtë është në favor të zgjidhjes dyshtetërore të konfliktit me Izraelin, si dhe i lejon Vatikanit të mbikëqyrë aspekte të jetës së Kishës Katolike edhe në zonat e kontrolluara prej Autoritetit Palestinez, të drejtuar nga Presidenti Abbas.
Izraeli, siç edhe mund të pritej, shprehu zhgënjimin e tij për këtë traktat, i cili përdor termin “shtet palestinez”.
Top Channel
