Goma për fshirjen e gabimeve duhet të hiqet nga përdorimi

Guy Claxton, profesor në “King College” të Londrës, është shprehur se fëmijët gënjehen se ekziston perfeksioni. Ai ka thënë se fëmijët nuk duhet të kenë frikë nga gabimet, por duhet t’i shfrytëzojnë ato për të mësuar.

“Fshirësja është një instrument i djallit, sepse bën që fëmijët të kenë turp për gabimet e tyre. Është sikurse të gënjejmë botën dhe të themi: ‘Nuk bëj gabime, e bëra siç duhet që me herën e parë’. Ndërkohë ne kemi nevojë për një kulturë tjetër, për fëmijë që nuk kanë frikë nga gabimet, por të mësojnë prej tyre”, ka shtuar Claxton.

Fshirja e gabimeve nuk i përgatit fëmijët për jetën, sipas profesorit Claxton, që duke iu referuar një kërkimi të Paul Tough, autor i librit “How Children Succeed”, thotë se shkolla duhet të përgatisë fëmijët për atë që i pret në të ardhmen.

“Fëmijëve duhet t’u thuhet se mësuesit kanë bërë gabime, prindërit gjithashtu, dhe jo të gënjehen. Fshirësja nuk i përgatit për jetën, në një shekull ku shumë punë duhet që t’i bësh vetë. Shkolla nuk duhet të jetë një vend ku përgjigjet e sakta bëjnë të kalosh provimin, por një vend që i përgatit nxënësit për botën reale, jashtë atyre mureve”, ka thënë Claxton.

Top Channel