Prishtinë, nis “java e luleshtrydhes”
28/05/2015 00:00
Eksperti evropian: Kushtëzimi i anëtarësimit të Kosovës në KiE me krijimin e Asociacionit pamundëson realizimin e të dyjave 04/05 20:52
Të enjten, në Kosovë ka filluar java e luleshtrydhes, një ngjarje që mbledh kultivues të shumtë të këtij fruti, në të dy anët e sheshit “Nëna Tereza”, në Prishtinë.
Kultivuesit, të cilët po promovojnë luleshtrydhet, u vizituan nga ministri i Bujqësisë, Pylltarisë dhe Zhvillimit Rural, Memli Krasniqi, dhe drejtori i misionit të USAID në Kosovë, James Hope, si dy mbështetës të këtij sektori.
USAID dhe Ministria e Bujqësisë, tashmë e kanë kthyer në traditë shënimin e “Javës së luleshtrydhes”, duke organizuar këtë aktivitet për të 4-tin vit me radhë.
Ministri i Bujqësisë, Memli Krasniqi, gjatë kësaj vizite foli për bashkëpunimin e mirë me USAID-in dhe tha se kultivuesit e luleshtrydhes kanë arritur të shtojnë vitet e fundit sipërfaqet e mbjellura, duke ndikuar dukshëm në rritjen e vendeve të punës dhe zhvillimit ekonomik lokal.
Ai bëri të ditur se, Ministria e Bujqësisë, për herë të parë ka filluar edhe me subvencionimin e pemishteve ekzistuese, duke i ndihmuar fermerët me nga 400 euro për hektar.
Ndërsa drejtori i misionit të USAID në Kosovë, James Hope tha se bujqësia është njëri nga sektorët më të rëndësishëm në Kosovë, që zhvillon ekonominë e vendit, dhe se USAID e ka mbështetur për vite me radhë këtë sektor.
Kultivuesit e luleshtrydhes u shprehën të kënaqur me përkrahjen e Ministrisë së Bujqësisë, ndërsa në shesh do të qëndrojnë deri më 31 maj, ku do të shesin luleshtrydhe me çmime shumë më të ulëta.
Top Channel
