Lindje e Mesme, Izraeli godet Gazën. Shënjestrër, një vendtrajnim i Hamasit

Lajmi është bërë i ditur nga ushtria izraelite, e cila të shtunën sqaroi se raketa kishte rënë në një fushë të hapur dhe nuk kishte shkaktuar ndonjë dëm madhor apo të plagosur. Megjithatë, edhe nga sulmi ajror i Izraelit nuk raportohet asnjë viktimë deri më tani, edhe pse ai shënjestroi një vend ku stërviten militantë të Hamasit.

Në deklaratën e lëshuar nga një zëdhënës i ushtrisë izraelite lexohet se sulmi ajror kishte për objektiv “infrastrukturën e terroristëve në veri të Rripit të Gazës. Goditjet në shenjë janë konfirmuar”.

Lëshimet sporadike të raketave nga Gaza, gjatë javëve të fundit, kanë prishur qetësinë midis dy kufijve në Lindjen e Mesme, që prej luftës 50-ditore të Izraelit kundër Hamasit, e cila mori fund me paqen e ndërmjetësuar nga Egjipti, gushtin e vitit të kaluar.

Sirenat e një “sulmi” ajror u dëgjuan në zonën e Ashkelonit, një qytet rreth 10 km në veri të Gazës, me një popullsi prej rreth 120 mijë banorësh.

Një grup xhihadistësh salafi, i mbiquajtur “Omar Brigades” dhe simpatizantë të Shtetit Islamik, morën përsipër përgjegjësinë për lëshimin e raketës në Ashkelon, por edhe lëshimet sporadike të ditëve të fundit.

Grupi xhihadist tha se raketa e rënë në Ashkelon ishte në shenjë solidariteti me të burgosurit palestinezë të mbajtur në burgjet izraelite, si dhe anëtarëve të tyre të burgosur në burgjet e kontrolluara prej Hamasit, në Gaza.

“Hebrenjtë nuk do të shijojnë kurrë mbrojtje dhe siguri, për sa kohë që ne të jemi gjallë”, thuhej në deklaratën e xhihadistëve.

Top Channel