Rusia refuzon nënshkrimin e raportit vjetor të IAEA: Sevastopoli nuk është në Ukrainë

Lajmi është bërë i ditur nga dy diplomatë të lartë të pranishëm në takim, për agjencinë e lajmeve “Reuters” këtë të hënë.

Rusia e aneksoi Krimenë vitin e kaluar, por shumica e vendeve e konsiderojnë atë ende pjesë të Ukrainës. Ky zhvillim i fundit nga Rusia nuk pritet të bllokojë raportin, por ngre pyetje tepër serioze në lidhje me juridiksionin në rajonin e kontestueshëm.

Ukraina ka protestuar kundër kësaj lëvizjeje të Rusisë në takimin e bordit të guvernatorëve të IAEA-së (Agjencisë Ndërkombëtare për Energjinë Bërthamore), që mblidhet çdo tremujor, bëri të ditur një diplomat perëndimor.

Të paktën 8 vende bënë të ditur se nuk do të pranonin refuzimin e Rusisë, duke cituar një rezolutë të Kombeve të Bashkuara në vitin 2014, e cila konfirmon integritetin territorial të Ukrainës, sipas një tjetër diplomati.

Ky i fundit shtoi se Rusia kërkoi që qëndrimi i saj të reflektohej edhe në të dhënat zyrtare të debatit, kur raporti i përvitshëm i IAEA-së të procedohej më tej në Kombet e Bashkuara.

Në Kiev, agjencia shtetërore “EnergoAtom”, e cila përkujdeset për impiantet e energjisë bërthamore, bëri të ditur se kishte njoftuar IAEA-në për pamundësi të përmbushjes së përgjegjësive ndaj reaktorëve në Krime, sepse nuk ka më akses në to që prej aneksimit të gadishullit nga Rusia.

Ministri rus i Energjisë, ashtu sikurse dhe Koorporata shtetërore për Energjinë Bërthamore “Rosatom”, refuzuan të komentonin mbi këtë zhvillim.

Top Channel