Greqia, sërish e gatshme për kompromis; Merkel: Nuk mbetet edhe shumë kohë

Vetëm 3 ditë pasi kryeministri Alexis Tsipras refuzoi propozimin e fundit nga BE dhe FMN duke e quajtur “absurde”, qeveria greke ka bërë të ditur se është e gatshme të negociojë një marrëveshje të pranueshme për të dyja palët deri në fund të këtij muaji; kur programi i shpëtimit për Greqinë skadon dhe kur vendi helen do të përballet me falimentin për shkak të borxheve.

Pavarësisht kësaj atmosfere të re pozitive, një zyrtar i BE-së tha se nuk ka ende “ndonjë zhvillim të ri” në synimin për të arritur një marrëveshje, sipas së cilës kreditorët do të rifillojnë dhënien e ndihmës ndaj Athinës, në këmbim të premtimit për reforma dhe më shumë masa shtrënguese.

Athina dhe Brukseli këmbyen propozimet e tyre gjatë javës së kaluar, me shpresën për të tejkaluar ngërçin, i cili nëse nuk zgjidhet do ta detyrojë Greqinë të dalë nga Eurozona, një zhvillim që do të trondiste edhe tregjet financiare, madje edhe ekonominë globale.

Merkel, e cila pritet të takojë Tsiprasin, së bashku me Presidentin francez, Francois Hollande, gjatë së mërkurës, theksoi dëshirën e saj për qëndrimin e Greqisë si pjesë e bllokut të monedhës së përbashkët. Por, teksa foli pas samitit të 7 kombeve më të industrializuara, G7, në Gjermani, ajo u shpre se “nuk ka mbetur edhe shumë kohë. Të gjithë po punojnë intensivisht”.

Presidenti amerikan, Barack Obama, pas takimit në alpet bavareze, u shpreh se Greqia duhet të bëjë “disa zgjedhje të vështira politike” dhe se të dyja palët duhet të tregojnë fleksibilitet.

Hollande nënvizoi faktin se arritja e një marrëveshjeje në momentet e fundit, mund ta rrëzojë atë poshtë shumë shpejt. Tsipras ka bërë thirrje për bisedime politike me bazë të gjerë, por Hollande e bëri të qartë se BE është më shumë e interesuar për detajet e asaj që do të premtojë ai.

“Ne duhet medoemos të kemi në orët apo ditët në vijim bisedime teknike për të sheshuar pozicionet tona dhe për të zëvendësuar propozimet e papranueshme nga Greqia me masa alternative”, tha Hollande pas takimit të G7-s.

Ndërkaq, negociatorët grekë kanë qenë duke zhvilluar bisedime në Bruksel me Komisionerin e BE-së për çështjet ekonomike, Pierre Moscovici.

Top Channel